قازاقستان ۇلتتىق بانكى ازاماتتاردى «توكەنيزاسيالانعان التىنعا» ينۆەستيسيا سالۋ ارقىلى جوعارى تابىس ۋادە ەتەتىن جاڭا الاياقتىق سحەماسى تۋرالى ەسكەرتتى، دەپ حابارلايدى infohub.kz.
ناسبانكتىڭ ءباسپاسوز قىزمەتىنىڭ مالىمەتىنشە، الەۋمەتتىك جەلىلەردە، مەسسەندجەرلەردە جانە فورۋمداردا الاياقتار ينۆەستيسيالىق كومپانيالار اتىنان «توكەنيزاسيالانعان التىن»، «وتە جوعارى تابىستى جاساندى ينتەللەكت ازىرلەمەلەرى» جانە «نەيروجەلى نەگىزىندەگى روبوت-ترەيدەر» سەكىلدى ۇسىنىستاردى تاراتادى.
«الاياقتار وزدەرىن قارجى كەڭەسشىلەرى رەتىندە تانىستىرىپ، „ينۆەستيسيالىق پلاتفورمانىڭ“ نەمەسە „كريپتوسەرۆيستىڭ“ جوعارى تابىستىلىعى تۋرالى جالعان ستاتيستيكانى كورسەتىپ، بروكەرلىك نەمەسە كريپتوۆاليۋتا پلاتفورماسىنا ۇقسايتىن سايتقا تىركەلۋگە كومەكتەسەدى. مۇنداي سايتتاردا ناقتى ينۆەستيسيالىق قىزمەتتىڭ كورىنىسى جاسالادى: گرافيكتەر، مامىلەلەر تاريحى، جەكە كابينەت جانە قولداۋ چاتى كورسەتىلەدى»، — دەدى ناسبانكتە.
سەنىمگە كىرۋ ءۇشىن الاياقتار پايدالانۋشىعا از عانا «پايدانى» الۋعا مۇمكىندىك بەرەدى. ودان كەيىن «بىرەگەي ۇسىنىس»، «كىرىستىڭ ءوسۋى» نەمەسە «ەرەكشە ءتيىمدى مامىلە» سىلتاۋىمەن ۇلكەن سوما سالۋعا كوندىرەدى. پايدالانۋشىنىڭ شوتىنداعى قاراجات ايتارلىقتاي وسكەن كەزدە، اقشانى شىعارۋ مۇمكىن بولمايدى. سونىمەن قاتار الاياقتار سالىق، كوميسسيا نەمەسە ساقتاندىرۋ تولەۋدى تالاپ ەتەدى.
«زاڭدىلىق كورىنىسىن بەرۋ ءۇشىن الاياقتار پايدالانۋشىلارعا ءمور، قول، سەريالىق نومىرلەر جانە باسقا دا دەرەكتەمەلەرى بار جالعان حاتتار مەن قۇجاتتاردى جىبەرەدى. „سالىقتار، كوميسسيالار“ نەمەسە باسقا دا الىمداردى تولەۋ سىلتاۋىمەن اقشانى العاننان كەيىن الاياقتار بايلانىستى توقتاتادى، ال پلاتفورماعا كىرۋ بۇعاتتالادى»، — دەپ اتاپ ءوتتى ناسبانكتە.
ناسبانك ءوز قىزمەتكەرلەرىنىڭ اۋديو- جانە بەينەقوڭىراۋلار جاسامايتىنىن، جەكە تۇلعالاردىڭ شوتتارىنا قىزمەت كورسەتپەيتىنىن، ينۆەستيسيالىق قورلارعا نەمەسە باسقا قارجى ونىمدەرىنە ينۆەستيسيا سالۋدى ۇسىنبايتىنىن، ساقتاندىرۋمەن اينالىسپايتىنىن جانە حالىقپەن اقشالاي ەسەپ ايىرىسۋلاردى جۇرگىزبەيتىنىن ەسكە سالدى.
«ەگەر ءسىز الاياقتىق ارەكەتتەرگە تاپ بولساڭىز، قازاقستان رەسپۋبليكاسىنىڭ قۇقىق قورعاۋ ورگاندارىنا ءتيىستى وتىنىشپەن جۇگىنۋدى ۇسىنامىز. كەڭەس الۋ ءۇشىن ۇلتتىق بانكتىڭ 1477 قىسقا نومىرىنە حابارلاسۋعا بولادى»، — دەدى ءباسپاسوز قىزمەتى.