قازاقستان ۇلتتىق بانكى كاپيتال نارىعىنداعى قاتىسۋىن بىرتىندەپ قىسقارتىپ، كەلەشەكتە زەينەتاقى اكتيۆتەرىن باسقارۋ فۋنكسياسىن ءبىرىڭعاي جيناقتاۋشى زەينەتاقى قورىنا (بجزق) بەرۋدى كوزدەپ وتىر. بۇل تۋرالى بجزق-نىڭ «زەينەتاقى جۇيەسى تۋرالى ديالوگتار» پودكاستىندا قازاقستان قارجىگەرلەر قاۋىمداستىعىنىڭ (ققق) ءتوراعاسى ەلەنا باحمۋتوۆا مالىمدەدى، دەپ حابارلايدى infohub.kz سايتى.
ققق باسشىسىنىڭ ايتۋىنشا، ينۆەستيسيالىق ستراتەگيالاردى ازىرلەۋ مەن اكتيۆتەردى ءىشىنارا باسقارۋدى قورعا بەرۋ تەك كەلەشەكتە مۇمكىن بولادى. بۇل باستامانى جۇزەگە اسىرۋ ءۇشىن بجزق-عا ينۆەستيسيالىق سالادا قاجەتتى بىلىكتىلىك پەن تەرەڭ ماماندانۋدى جيناقتاۋعا ۋاقىت كەرەك.
«ۇلتتىق بانكتىڭ ءوزى كاپيتال نارىعىنداعى قاتىسۋى تىم كوپ ەكەنىن جانە بىرتىندەپ شىعۋى كەرەكتىگىن مويىنداپ وتىرعاندىقتان، ۋاقىت وتە كەلە ينۆەستيسيالىق ستراتەگيالار بويىنشا ۇسىنىستار ازىرلەۋ، ءىشىنارا باسقارۋ، مۇمكىن، كەلەشەكتە ءبىرىڭعاي جيناقتاۋشى زەينەتاقى قورىنا بەرىلەتىن بولادى. ارينە، ول ءۇشىن ۋاقىت كەرەك، ول ءۇشىن سوندا جيناقتالۋى ءتيىس بىلىكتىلىك قاجەت»، – ءتۇسىندىردى باحمۋتوۆا.
ققق باسشىسى اتاپ وتكەندەي، كادر ماسەلەسىنەن بولەك، رەفورما قوردىڭ ىشىندەگى ىقتيمال مۇددەلەر قاقتىعىسىن دا بولدىرماۋدى تالاپ ەتەدى. ونىڭ ايتۋىنشا، بجزق سەنىمدى ەسەپكە الۋ ۇيىمى مارتەبەسىن ساقتاپ، سالىمشىلار ءوز جيناقتارى تۋرالى تولىق اقپارات الاتىن ءبىرىڭعاي تەرەزە ءرولىن اتقارۋى ءتيىس.
«ۇلتتىق بانكتىڭ فۋنكسيالارى دا بۇل ماسەلەدە بىرتىندەپ ازايا بەرەتىن بولادى. مۇمكىن، بۇل اناعۇرلىم ۇزاق ۋاقىتتى قاجەت ەتەتىن شىعار»، – دەپ قورىتىندىلادى باحمۋتوۆا.
ەسكە سالايىق، 2026 جىلعى 7 قىركۇيەكتەن باستاپ قازاقستاندا الەۋمەتتىك كودەكسكە ەنگىزىلگەن تۇزەتۋلەر كۇشىنە ەنىپ، جەكە ينۆەستيسيالىق پورتفەلدى باسقارۋشىلارعا (جيپب) مىندەتتى، مىندەتتى كاسىپتىك جانە ەرىكتى زەينەتاقى جارنالارى ەسەبىنەن قالىپتاسقان جيناقتاردىڭ 100%-عا دەيىنگى بولىگىن بەرۋگە رۇقسات بەردى. بۇعان دەيىن شەك 50%-عا دەيىن عانا ەدى.
بۇعان دەيىن «كۋرسيۆ» كەيبىر سالىمشىلار جيناقتارىنىڭ 100%-ىن جيپب-عا اۋدارۋعا تىرىسقاندا جۇيەدەگى تەحنيكالىق قاتەلىككە بايلانىستى باس تارتۋعا تاپ بولعانىن جازعان ەدى.