2026 جىلدىڭ سەگىز ايىندا زەينەتاقى اكتيۆتەرىن باسقاراتىن جەكە كومپانيالاردىڭ بارلىعى جيناقتالعان ينفلياسيادان (6،37%) جوعارى تابىس كورسەتتى. ناقتى ماندە زەينەتاقى جيناقتارىن قۇنسىزداندىرعان جالعىز باسقارۋشى — ۇلتتىق بانك، دەپ حابارلايدى infohub.kz.
قازاقستاندىقتاردىڭ زەينەتاقى اكتيۆتەرى ءبىرىڭعاي جيناقتاۋشى زەينەتاقى قورىندا (بجزق) ساقتالىپ قانا قويماي، ينفلياسيادان قۇنسىزدانۋدان قورعاۋ ءۇشىن ءتۇرلى قارجى قۇرالدارىنا ينۆەستيسيالانادى.
1 قىركۇيەكتەگى جاعداي بويىنشا ۇلتتىق بانكتىڭ باسقارۋىندا زەينەتاقى اكتيۆتەرىنىڭ 94،66%-ى، ياعني 26،95 ترلن تەڭگە بولدى. جىل باسىنان بەرى بجزق سالىمشىلارىنىڭ شوتتارىنا نەگىزگى باسقارۋشىدان 1،10 ترلن تەڭگە ينۆەستيسيالىق تابىس ەسەپتەلدى. تابىستىلىق 4،2%-دى قۇرادى. سەگىز ايداعى 6،37% ينفلياسيانى ەسكەرسەك، ناقتى ماندە زەينەتاقى جيناقتارى 2،17%-عا قۇنسىزداندى.
بجزق-نىڭ وزىندە اعىمداعى جىلدىڭ باسىنان بەرى ينۆەستيسيالىق تابىستىڭ تومەندەۋىنە تەڭگەنىڭ نىعايۋى سالدارىنان ۆاليۋتالىق اكتيۆتەردىڭ تەرىس باعامدىق قايتا باعالانۋى سەبەپ بولعانىن ءتۇسىندىردى.
تابىستىلىق بويىنشا كوش باستاعان — پورتفەلى 22،6 ملرد تەڭگە بولاتىن «سەنتراس سەكيۋريتيز» كومپانياسى. ونىڭ باسقارۋىنداعى زەينەتاقى اكتيۆتەرىنىڭ تابىستىلىعى سەگىز ايدا 12،18%، ناقتى ماندە 6،43% بولدى. سالىمشىلاردىڭ شوتتارىنا 1،2 ملرد تەڭگە ەسەپتەلدى.
ودان كەيىن جەكە باسقارۋشىلار اراسىندا ەڭ ۇلكەن پورتفەلى — 77،6 ملرد تەڭگە — Halyk Finance تۇر. كومپانيا 9،06% تابىستىلىق كورسەتتى، ينفلياسيانى ەسكەرگەندە 2،69%. سالىمشىلاردىڭ شوتتارىنا 5،8 ملرد تەڭگە ءتۇستى.
جالپى زەينەتاقى اكتيۆتەرىن باسقارۋشىلاردىڭ تابىستىلىعى بىلايشا قالىپتاستى: «سەنتراس سەكيۋريتيز» — 12،18% (ينفلياسيانى ەسكەرگەندە 6،43%)؛ Halyk Finance — 9،06% (ناقتى ماندە +2،69%)؛ Alatau City Invest — 8،25% (1،88%)، پورتفەلى 24 ملرد تەڭگە؛ BCC Invest — 8،09% (1،72%)، پورتفەلى 19،6 ملرد تەڭگە؛ Halyk Global Markets — 7،55% (1،18%)، باسقارۋىندا 6،6 ملرد تەڭگە؛ Tansar Capital — ساۋىردەن بەرى 2،43%، پورتفەلى — 743،66 ملن تەڭگە.
ايتا كەتەيىك، سوڭعى 3،5 جىلدا زەينەتاقى اكتيۆتەرىن باسقارۋشىلار اراسىندا تابىستىلىق بويىنشا كوش باستاعان «سەنتراس سەكيۋريتيز» — 64،07% تابىستىلىقپەن ينفلياسيادان 21،7 پ.پ. وزدى. ۇلتتىق بانك 45،51% تابىستىلىق كورسەتىپ، ينفلياسيادان نەبارى 3،11 پ.پ. استى.