ۇلىتاۋ وبلىسىندا جاڭعىرتۋدان كەيىن جولاۋشىلارعا ءتورت تەمىرجول ۆوكزالى قايتا اشىلدى. جاڭارتىلعان نىساندار جەزقازعان جانە قاراجال قالالارىندا، جاڭاارقا اۋدانىندا جانە قىزىلجار ستانسياسىندا ورنالاسقان، دەپ حابارلايدى infohub.kz سايتى.
جۇمىستار مەملەكەت باسشىسى قاسىم-جومارت كەمەل ۇلى توقاەۆتىڭ تاپسىرماسىنا سايكەس جانە ۇكىمەتتىڭ قولداۋىمەن ەلىمىزدەگى 125 تەمىرجول ۆوكزالىن جاڭعىرتۋ جوباسى اياسىندا اتقارىلدى. جوبانى جۇزەگە اسىرۋ قازاقستان رەسپۋبليكاسى كولىك مينيسترلىگىنىڭ، «سامۇرىق-قازىنا» اكسيونەرلىك قوعامىنىڭ، «قازاقستان تەمىر جولى» ۇلتتىق كومپانياسى» اكسيونەرلىك قوعامىنىڭ جانە ۇلىتاۋ وبلىسى اكىمدىگىنىڭ بىرلەسكەن جۇمىسىنىڭ ناتيجەسى بولدى.
جاڭارتىلعان ۆوكزالدار زاماناۋي تالاپتارعا ساي جابدىقتالىپ، جولاۋشىلارعا قولايلى جاعداي جاسايدى. ۇلىتاۋ وبلىسىنىڭ اكىمى ەسەت بايكەن ۆوكزالداردى جاڭعىرتۋ ءوڭىردىڭ كولىك ينفراقۇرىلىمىن دامىتۋداعى ماڭىزدى قادام ەكەنىن اتاپ ءوتتى.
«مەملەكەت باسشىسىنىڭ تاپسىرماسىمەن سالىنىپ جاتقان قىزىلجار — مويىنتى تەمىرجول جەلىسى ءوڭىرىمىزدىڭ دامۋىنا جاڭا سەرپىن بەرىپ قانا قويماي، ەلىمىزدىڭ ترانزيتتىك الەۋەتىن دە ارتتىرارى ءسوزسىز. جالپى وبلىستا كولىك ينفراقۇرىلىمىن دامىتۋ بويىنشا اۋقىمدى جۇمىستار جۇرگىزىلۋدە. تەمىرجول قاتىناسىن جاقسارتۋمەن قاتار، اۆتوموبيل جولدارىنىڭ ساپاسىن ارتتىرۋعا باسىم كوڭىل بولىنۋدە. جەزقازعان — قىزىلوردا اۆتوجولىنداعى جۇمىستار 90 پايىزعا ورىندالدى. جاقىن ايلاردا قوزعالىس اشىلادى دەپ جوسپارلانۋدا. جەزقازعان — قاراعاندى باعىتىندا اعىمداعى جىلى جەر توسەمەسىن سالۋ جانە ماتەريالدىق-تەحنيكالىق قامتاماسىز ەتۋ جۇمىستارىن تولىق اياقتاۋ جوسپارلانۋدا. سونىمەن قاتار، ۇلىتاۋ — ارقالىق جولىنىڭ 89 شاقىرىمدىق ۋچاسكەسىن جوندەۋ قازان ايىندا اياقتالادى»، — دەدى وبلىس اكىمى.
جەزقازعان تەمىرجول ۆوكزالىنىڭ عيماراتى 1941 جىلى سالىنعان. سودان بەرى ول العاش رەت كەشەندى جاڭعىرتۋدان ءوتتى. جوبا اياسىندا ۆوكزال عيماراتىنىڭ اۋدانى 541 شارشى مەتردەن 2 500 شارشى مەترگە ۇلعايتىلدى. جاڭارتىلعان ۆوكزال ءبىر ۋاقىتتا 500-گە جۋىق جولاۋشىنى قابىلداپ، تاۋلىگىنە 2 مىڭ ادامعا دەيىن قىزمەت كورسەتە الادى.
قازىرگى تاڭدا ۇلىتاۋ وبلىسى ەلىمىزدىڭ التى وبلىسىمەن تەمىرجول قاتىناسىمەن بايلانىسقان. جاڭعىرتىلعان ۆوكزالدار ءوڭىر تۇرعىندارى مەن قوناقتارى ءۇشىن قولايلى ءارى ءقاۋىپسىز جاعداي جاساۋعا مۇمكىندىك بەرەدى.