ساۋد ارابياسىنىڭ بيلىگى قاجىلارعا ءبىر جىل مەرزىمگە كوپ رەتتىك ۋمرا ۆيزاسىن ەنگىزدى. بۇل ۆيزا كورولدىككە بىرنەشە رەت كىرۋگە مۇمكىندىك بەرەدى، ءبىراق جالپى بولۋ مەرزىمى 90 كۇننەن اسپاۋى ءتيىس، دەپ حابارلايدى infohub.kz.
ساۋد ارابياسىنىڭ قاجىلىق جانە ۋمرا ىستەرى مينيسترلىگىنىڭ حابارلاۋىنشا، جاڭا ۆيزا 365 كۇن جارامدى جانە كوپ رەت كىرۋگە مۇمكىندىك بەرەدى. ەلدە بولۋدىڭ جالپى مەرزىمى 90 كۇننەن اسپاۋى كەرەك. ءار ساپار الدىندا قاجىلار Nusuk پلاتفورماسى ارقىلى ۋمرا جاساۋعا رۇقسات الۋى، سونداي-اق ءقوناقۇي، كولىك جانە باسقا دا قىزمەتتەردى الدىن الا برونداۋى قاجەت.
ايتا كەتۋ كەرەك، كوپ رەتتىك ۋمرا ۆيزاسى قاجىلىق ماۋسىمى كەزىندە ۋمرا جاساۋعا قۇقىق بەرمەيدى. 90 كۇندىك بەلگىلەنگەن ءليميتتى پايدالانعاننان كەيىن قايتا كىرۋ ءۇشىن جاڭا ۆيزا راسىمدەۋ قاجەت. مينيسترلىك بۇل ۆيزانىڭ ەنگىزىلۋى قاجىلارعا قىزمەت كورسەتۋ جۇيەسىن قولداۋدىڭ جالعاسى جانە كورسەتىلەتىن قىزمەتتەردى دامىتۋ اياسىنداعى قادام ەكەنىن اتاپ ءوتتى.