ءۇندىستان عارىش سالاسىنداعى دامۋىندا تاعى ءبىر ماڭىزدى قادام جاسادى: جەكە كومپانيا Skyroot Aerospace ءوزىنىڭ العاشقى Vikram-1 زىمىران-تاسىعىشىن ءساتتى ۇشىردى. بۇل ەلدىڭ الەمدىك كوممەرسيالىق عارىشتىق ۇشىرىلىمدار نارىعىندا نەگىزگى ويىنشىلاردىڭ ءبىرى بولۋ نيەتىن راستادى، دەپ حابارلايدى infohub.kz.
ۇشىرىلىم 18 شىلدەدە اندحرا-پرادەش شتاتىنداعى شريحاريكوتا ارالىندا ورنالاسقان ساتيش دحاۆان عارىش ايلاعىنان جاسالدى. بيىكتىگى شامامەن 22 مەتر بولاتىن زىمىران تومەنگى جەر وربيتاسىنا 350 كەلىگە دەيىنگى پايدالى جۇكتى شىعارا الادى.
Vikram-1 العاشقى ميسسياسى اياسىندا ءۇندىستاندىق جانە شەتەلدىك تاپسىرىس بەرۋشىلەردىڭ بىرنەشە ەكسپەريمەنتتىك جۇكتەرىن وربيتاعا جەتكىزەدى. ولاردىڭ ىشىندە زەرتحانادا وسىرىلگەن الماز جانە عارىش قوقىسىن جيناۋعا ارنالعان روبوتتى مانيپۋلياتورلار بار. كومپانياداعىلار ۇشۋ باستى ماقساتى – قوزعالتقىشتى، ناۆيگاسيا، تەلەمەتريا جانە اۆيونيكا جۇيەلەرىن سىناۋ، سونداي-اق بولاشاق كوممەرسيالىق ۇشىرىلىمدارعا قاجەتتى دەرەكتەردى جيناۋ ەكەنىن اتاپ ءوتتى.
ءۇندىستان پرەمەر-مينيسترى نارەندرا مودي ۇشىرىلىمدى ۇلتتىق عارىش باعدارلاماسى ءۇشىن «شەشۋشى ءسات» دەپ اتادى. بۇل كومپانيانىڭ العاشقى جەتىستىگى ەمەس: 2022 جىلى Vikram-S زىمىرانى العاشقى سۋبوربيتالدى ۇشۋدى ورىنداپ، ەلدەگى جەكە عارىش سالاسىنىڭ دامۋىندا ماڭىزدى كەزەڭ بولدى.
بۇل باعىتتىڭ دامۋى 2020 جىلعى رەفورمادان كەيىن مۇمكىن بولدى، سول كەزدە ءۇندىستان عارىش سەكتورىن جەكە ينۆەستيسيالارعا اشتى. بۇعان دەيىن زىمىراندار مەن سپۋتنيكتەردى ازىرلەۋمەن تەك ءۇندىستان عارىشتىق زەرتتەۋلەر ۇيىمى (ISRO) اينالىساتىن.
سوڭعى جىلدارى ءۇندىستان جەتەكشى عارىش دەرجاۆالارى قاتارىنداعى ورنىن ايتارلىقتاي نىعايتتى. 2023 جىلعى تامىزدا ەل كسرو، اقش جانە قىتايدان كەيىن ايعا عارىش اپپاراتىن ءساتتى قوندىرعان الەمدەگى ءتورتىنشى مەملەكەت بولدى. جەر سەرىگىنىڭ وڭتۇستىك پوليۋسىنە قونعان «چاندرايان-3» ميسسياسى بۇكىل الەم بويىنشا ميلليونداعان كورەرمەننىڭ نازارىن اۋداردى.
ەندى بيلىك عارىش سالاسىن ەكونوميكانىڭ درايۆەرلەرىنىڭ بىرىنە اينالدىرۋدى كوزدەيدى. ۇكىمەت جوسپارلارى بويىنشا، 2033 جىلعا قاراي ءۇندىستاننىڭ عارىش يندۋسترياسىنىڭ كولەمى 44 ميلليارد دوللارعا جەتۋى كەرەك، ال ەلدىڭ الەمدىك نارىقتاعى ۇلەسى قازىرگى 2%-دان 10%-عا دەيىن ارتۋى ءتيىس.