قازاقستاندىق مما جۇلدىزى قۋات «نايمان» حاميتوۆ تاعى دا كوپشىلىكتىڭ نازارىن وزىنە اۋداردى. بۇل جولى تاجىريبەلى سپورتشى تانىمال اكتەر ءارى فايتەر ەركەبۇلان توقتارمەن جۇدىرىقتاسۋعا نيەت ءبىلدىرىپ وتىر. ءبىراق شارت بويىنشا جەكپە-جەك مما ەمەس، كاسىپقوي بوكس ەرەجەسىمەن ءوتۋى ءتيىس.

حاميتوۆ ءوزىنىڭ Instagram پاراقشاسىندا وتاندىق پروموۋشەندەردى سىنعا الىپ، ناعىز شوۋدىڭ جوقتىعىنا قىنجىلدى. ونىڭ ويىنشا، جانكۇيەرلەر كۇتكەن ناعىز "بلوكباستەر" — وسى ەكى جۇلدىزدىڭ كەزدەسۋى بولماق.

«نايماننىڭ» پىكىرىنشە، قازاقستانداعى قازىرگى تۋرنيرلەر جانكۇيەرلەردىڭ تالابىنا ساي ەمەس.

«كەشىر، براتان، ءبىراق...»

قۋات حاميتوۆ جەرگىلىكتى ۇيىمداستىرۋشىلاردىڭ دەڭگەيىنە كوڭىلى تولمايتىنىن اشىق ايتتى. ول قازىرگى جەكپە-جەك كەشتەرىن «جاساندى» دەپ باعالادى.

«قازاقستانداعى پروموۋتەرلەردىڭ تۋرنير ۇيىمداستىرۋ دەڭگەيىنەن شىنىمەن دە كوڭىلىم قالدى! ناعىز ماسشتاب قايدا، شوۋ قايدا؟ ءبارى جاساندى، ءبارى وتىرىك قوي… جىلدىڭ ەڭ ايتۋلى جەكپە-جەگى – قۋات حاميتوۆ پەن ەركەبۇلان توقتار اراسىنداعى كەزدەسۋ! بۇدان اسقان جەكپە-جەك وتاندىق بوكس الاڭىندا بولمايدى!»، – دەپ جازدى سپورتشى.

سونىمەن قاتار، حاميتوۆ ءوزىنىڭ جەڭىسكە جەتەتىنىنە ءجۇز پايىز سەنىمدى. ول قارسىلاسىنا دەگەن قۇرمەتىن ساقتاي وتىرىپ، رينگتە ايامايتىنىن ەسكەرتتى: «مەن كەشىرىم سۇرايمىن ارينە، ءبىراق، بوكستان ۇرىپ جىبەرەم، براتان».

تاجىريبە مەن جاستىق: كىم مىقتى؟

ەگەر بۇل جەكپە-جەك راسىمەن وتسە، كىمنىڭ باسىم تۇسەتىنى قىزىق سۇراق.

  • قۋات حاميتوۆ: كاسىپقوي بوكستا ءبىر عانا كەزدەسۋ وتكىزگەن. بىلتىر قىركۇيەكتە وتانداسى نۇربەرگەن ءشارىپوۆتى تورەشىلەر شەشىمىمەن جەڭگەن بولاتىن.

  • ەركەبۇلان توقتار: ول دا وسال قارسىلاس ەمەس. جاقىندا عانا، 16 تامىزدا قوناەۆتا وتكەن Octagon 77 تۋرنيرىندە يراندىق فارزاد گادەريدى ەكىنشى راۋندتا تەحنيكالىق نوكاۋتپەن جەڭدى. بۇل ونىڭ مما-دەگى 11ء-شى جەڭىسى ەدى.

ازىرگە ەركەبۇلان توقتار تاراپىنان رەسمي جاۋاپ بولعان جوق.