نيۋ-يوركتە تەننيستەن اقش اشىق چەمپيوناتىنىڭ — بيىلعى «ۇلكەن دۋلىعا» ءتۋرنيرىنىڭ جەرەبەسى ءوتتى. قازاقستاندىق تەننيسشىلەر جەكە سىنداعى العاشقى قارسىلاستارىن ءبىلدى، دەپ حابارلايدى infohub.kz سايتى.
الەمنىڭ ەكىنشى راكەتكاسى ەلەنا رىباكينا احيلل جاراقاتىنا بايلانىستى ميكستتەن باس تارتقان ەدى، ال ءبىرىنشى اينالىمدا ول ۇيىمداستىرۋشىلاردان ۋايلد-كارد العان امەريكالىق تەيا فرودينمەن (رەيتينگتە 580-ورىن) كەزدەسەدى. يۋليا پۋتينسەۆا (80) ستارتتا شۆەيساريالىق بەليندا بەنچيچپەن (12)، ميكست فيناليسىمەن وينايدى.
الەكساندر بۋبليك (16) العاشقى اينالىمدا امەريكالىق دجەففري ۆۋلفپەن (248)، ال الەكساندر شەۆچەنكو (97) حورۆات دينو پريزميچپەن (101) ب ا ق سىنايدى.
تيموفەي سكاتوۆ (205) US Open جەكە سىنىندا بەسىنشى قازاقستاندىق بولا الار ەدى، ءبىراق ىرىكتەۋدىڭ ەكىنشى راۋندىندا بولگاريالىق گريگور ديميتروۆتەن (137) 6:7، 5:7 (4:6) ەسەبىمەن ۇتىلدى. وعان دەيىن پەتروپاۆلدىق تۋما بەلگيالىق جيل ارنو بەيليدى (240) 6:4، 6:2 ەسەبىمەن جەڭگەن بولاتىن.
قازاقستاندىقتار قاتىساتىن جۇپتىق جانە يۋنيورلىق تۋرنيرلەردىڭ جەرەبەسى كەيىنىرەك بەلگىلى بولادى.
ەكىنشى جىل قاتارىنان جاڭا فورماتتا ءوتىپ جاتقان ميكست جارىسىندا چەح تەننيسشىلەرى كارولينا مۋحوۆا مەن ياكۋب مەنشيك جەڭىمپاز اتاندى. ولار بۇگىنگى فينالدا شۆەيساريالىق-يتاليالىق جۇپ بەليندا بەنچيچ/فلاۆيو كوبولليدى 6:3، 1:6، 10:6 ەسەبىمەن تىزە بۇكتىردى.
اقش اشىق چەمپيوناتى — حاردتا وتەتىن جىل سايىنعى «ۇلكەن دۋلىعا» ءتۋرنيرى. كۇنتىزبەلىك جىلداعى ءتورت مەيدجوردىڭ سوڭعىسى.
العاش رەت 1881 جىلدىڭ تامىزىندا وتكەن US Open ەكىنشى جىل قاتارىنان ميكست ءتۋرنيرىنىڭ كەستەسىنە بايلانىستى ءبىر اپتا ەرتە باستالادى. جالپى جۇلدە قورى — $108 ملن — مەيدجورلار اراسىندا رەكوردتىق.
1978 جىلدان بەرى ماچتار نيۋ-يوركتەگى بيللي دجين كينگ اتىنداعى ۇلتتىق تەننيس ورتالىعىندا وتەدى.
ەرلەر اراسىندا قازىرگى چەمپيون — يسپانيالىق كارلوس الكاراس (3)، وتكەن جىلعى فينالدا ياننيك سيننەردى 6:2، 3:6، 6:1، 6:4 ەسەبىمەن جەڭگەن ەدى. ايتپاقشى، الەمنىڭ ءبىرىنشى راكەتكاسى يتاليالىق تىزە جاراقاتىنا بايلانىستى US Open-2026-دان باس تارتتى.
ايەلدەر اراسىندا 2025 جىلعى جەڭىمپاز — بەلارۋس ارينا سوبولەنكو. شەشۋشى ماچتا ول امەريكالىق اماندا انيسيموۆانى 6:3، 7:6 (7:3) ەسەبىمەن ۇتتى.