British Airways اۋەكومپانياسىنىڭ BA276 رەيسىندە ءۇندىستاننىڭ حايداراباد قالاسىنان لوندونعا ۇشقان ءۇش ۇشقىش بىردەي دىمكاس تارتتى، سەبەبى تاماقتان ۋلانۋ بولۋى مۇمكىن، دەپ حابارلايدى inbusiness.kz.
SkyMoments Telegram-ارناسىنىڭ مالىمەتىنشە، Boeing 777 ۇشاعىندا كاپيتان جانە ەكى ەكىنشى ۇشقىش بولعان. ولاردىڭ بىرەۋى ۇشۋ كەزىندە ەسىن جوعالتىپ، وتتەگىمەن قامتاماسىز ەتۋگە اۋىستىرىلعان. قالعان ەكى ەكيپاج مۇشەسى ۇشاقتى باسقارۋدى جالعاستىرىپ، حيتروۋ اۋەجايىنا امان-ەسەن قوندىرعان.
ۇشاق قونعاننان كەيىن ءۇش ۇشقىشتىڭ دا جاعدايى ناشارلادى. بىرەۋىنە شۇعىل مەديسينالىق كومەك، ودان كەيىن ۇزاق وپەراسيا قاجەت بولدى. اۋەكومپانيا ۇشۋ قاۋىپسىزدىگى بۇزىلماعانىن، الايدا وقيعا ءمان-جايى تەكسەرىلىپ جاتقانىن مالىمدەدى.
الدىن الا تەرگەۋ كورسەتكەندەي، ءۇش ۇشقىش حايدارابادتاعى ايالداما كەزىندە ءبىر قوناقۇيدە تۇرىپ، بىرگە تاڭعى اس ىشكەن. بۇل ۇشۋعا دەيىن تاماقتان ۋلانعان دەگەن بولجامعا اكەلدى. British Airways سونىمەن قاتار ەكيپاجداردى ورنالاستىرۋ جاعدايىن زەرتتەۋدە، ويتكەنى ءقوناقۇيدىڭ سانيتارلىق جاعدايىنا شاعىمدار تۇسكەن.
بۇل وقيعا اۆياسيا قاۋىمداستىعىنىڭ نازارىن اۋداردى، ويتكەنى ازاماتتىق اۆياسيادا ۋلانۋدى بولدىرماۋ ءۇشىن ەكيپاجعا ءارتۇرلى تاعامدار ۇسىنۋ ءداستۇرى بار. بۇل جاعدايدا پروبلەمانىڭ بولجالدى كوزى ۇشاقتان تىس جەردە بولعان.