قازاقستاندىق ميللياردەر بولات وتەمۇراتوۆ موناكوداعى ەڭ قىمبات تۇرعىن ءۇي جوباسى — Mareterra اۋدانىنىڭ ينۆەستورلارىنىڭ ءبىرى بولدى. قۇرىلىس اياقتالعاننان كەيىن التى اي ىشىندە بۇل جوبا $3 ملرد تازا پايدا اكەلدى، دەپ حابارلايدى infohub.kz سايتى.
Forbes Australia دەرەكتەرىنە سايكەس، تەڭىزدە 6 گەكتار اۋماقتا سالىنعان جاڭا Mareterra تۇرعىن اۋدانى شامامەن $2،3 ملرد تۇردى. كنياز البەرت II باستاماسىمەن جۇزەگە اسقان كنيازدىك اۋماعىن كەڭەيتۋ جوباسى 11 جىلعا سوزىلدى. جاساندى تۇبەك جاساۋ ءۇشىن موناكو شىعاناعىنىڭ تۇبىنە سۋ استى ۇيىندىسىنە 18 ۇلكەن بەتون قۇرىلىمى ورنالاستىرىلدى.
تازارتىلعان اۋماقتا ۆيللالار مەن ۇيلەر، ونىڭ ىشىندە كەمەنى ەسكە تۇسىرەتىن Le Renzo تۇرعىن كەشەنى سالىندى. يتالياندىق ساۋلەتشى رەنسو پيانو جوبالاعان ۇزىندىعى 126 مەتر بولاتىن عيماراتتا 47 ءساندى پاتەر بار. Mareterra تۇرعىندارىنىڭ اراسىندا — $550 ملن-عا 21 بولمەلى پاتەر ساتىپ العان ۋكراينالىق ميللياردەر رينات احمەتوۆ، حيميا ميللياردەرى دجەيمس رەتكليفف، سونداي-اق فورمۋلا-1 جۇرگىزۋشىلەرى ماكس فەرستاپپەن مەن شارل لەكلەر.
اۋدانداعى پاتەرلەردىڭ قۇنى شارشى مەترىنە شامامەن $138،9 مىڭعا جەتەدى — بۇل دۋبايدىڭ ەڭ بەدەلدى اۋداندارىنان ەكى ەسە قىمبات. ۆيللالار ودان دا قىمبات: اۋدانى 4،1 مىڭ شارشى مەتر، دەگۋستاسيا زالى، باسسەيندەرى، سپا-سالونى مەن ساۋناسى بار ۇيلەردىڭ ءبىرى 200 ملن ەۆروگا ساتىلىمعا قويىلعان.
2015 جىلى موناكو ۇكىمەتى SAM L'Anse du Portier كومپانياسىمەن كونسەسسيالىق كەلىسىم جاسادى. قۇرىلىسقا فرانسۋز ميللياردەر اعايىندى مارتين مەن وليۆەر بۋيگتەرگە تيەسىلى Bouygues كومپانياسى جاۋاپتى بولدى. ولار 10% اكسيا الدى، قالعان 90% جەكە ينۆەستورلار قولداعان ينۆەستيسيالىق قورعا تيەسىلى بولدى.
ءىرى ينۆەستورلاردىڭ قاتارىندا — 26% ۇلەسىمەن پاتريس پاستور، كازيراگي وتباسى (10،5%)، لوپەس دە لا وسا وتباسى، شۆەيساريالىق ميللياردەرلەر دجامماريو مەن ماريو دجەرمانو دجۋلياني، سونداي-اق بولات وتەمۇراتوۆ بار. ولاردىڭ ءارقايسىسى كومپانيا اكسيالارىنىڭ 5%-دان 10%-نا دەيىن يەلەندى.
كەلىسىم شارتتارى بويىنشا قۇرىلىستى ينۆەستورلار قارجىلاندىردى، ولار ساتۋدان تۇسكەن بارلىق پايدانى سالىقتار مەن مەملەكەتكە $460 ملن كولەمىندەگى ءبىرجولعى تولەمدى شەگەرگەننەن كەيىن الدى. جالپى ساتۋ كولەمى $6،6 ملرد-تان استى، بۇل قۇرىلىس شىعىندارىن وتەپ، $1،2 ملرد وبليگاسيالاردى جابۋعا جانە $1،8 ملرد-تان استام سالىق پەن كونسەسسيالىق تولەمدەردى تولەۋگە مۇمكىندىك بەردى.
قارجى قۇجاتتارىنا سايكەس، دەۆەلوپەرلىك كومپانيانىڭ تازا پايداسى 2025 جىلدىڭ 30 ماۋسىمىنداعى جاعداي بويىنشا $3 ملرد قۇرادى — جوبا اياقتالعاننان كەيىن نەبارى التى اي وتكەن سوڭ. بۇل پايدانىڭ ءبىر بولىگىن وتەمۇراتوۆ تا الدى.
«ءسىز شىنىمەن كورنەكتى نارسە جاساعاندا، نارىق سوعان ساي جاۋاپ بەرەدى. قارجىلىق ناتيجەدەن بولەك، موناكو مەن ايماق ءۇشىن ماڭىزدى بولعان جوبانى قولداعانىمىزعا شىنايى قاناعاتتانۋ بار»، — دەدى وتەمۇراتوۆ Forbes-كە بەرگەن تۇسىنىكتەمەسىندە.
اۋدان ساتىپ الۋشىلار ءۇشىن موناكو تۇرعىندارىنا سالىق جەڭىلدىكتەرىنىڭ ارقاسىندا تارتىمدى، سونداي-اق قىمبات جىلجىمايتىن م ۇلىك نارىعىنداعى باستى باسەكەلەس دۋباي يرانمەن قاقتىعىسقا تارتىلعاندىقتان دا.
بۇعان دەيىن بولات وتەمۇراتوۆتىڭ ۇلى انۋار بريتاندىق Pockit فينتەح-كومپانياسىنىڭ ديرەكتورلار كەڭەسىنە كىرگەنى حابارلانعان بولاتىن. بۇل كومپانيانىڭ ينۆەستورلارى اراسىندا «مانچەستەر يۋنايتەد»ء-تىڭ بۇرىنعى جاتتىقتىرۋشىسى الەكس فەرگيۋسون جانە Revolut ديرەكتورلار كەڭەسىنىڭ ءتوراعاسى مارتين گيلبەرت بار.