ۋتيل تولەمىنە قاتىستى داۋلار ءالى دە جالعاسىپ جاتقاندا، بۇل قاراجاتتىڭ ءبىر بولىگى تابيعي ورتتەرمەن كۇرەس تەحنيكاسىن جاڭارتۋعا جۇمسالدى. 2024 جىلدان باستاپ بۇل ماقساتقا 33 ملرد تەڭگەدەن استام قاراجات ءبولىنىپ، ورمان شارۋاشىلىعى، قورىقتار مەن ۇلتتىق پاركتەرگە مىڭنان استام جاڭا تەحنيكا بەرىلدى، دەپ حابارلايدى infohub.kz.
«جاسىل دامۋ» اق-نىڭ مالىمەتىنشە، 2024 جىلدان باستاپ تابيعات قورعاۋ مەكەمەلەرىنىڭ تەحنيكاسىن جاڭارتۋعا 33،1 ملرد تەڭگە بولىنگەن. بۇل قاراجاتقا ءورت ءسوندىرۋ اۆتوسيستەرنالارى، جوعارى ءجۇرىس قابىلەتى بار اۆتوموبيلدەر، تراكتورلار جانە ورمان مەن دالا ورتتەرىنىڭ الدىن الۋ مەن جويۋعا قاجەتتى باسقا دا ارنايى تەحنيكانىڭ 1006 بىرلىگى ساتىپ الىندى.
«2024 جىلدان بۇگىنگە دەيىن ەلىمىزدىڭ مەملەكەتتىك ۇلتتىق تابيعي پاركتەرىنە، ورمان رەزەرۆاتتارىنا، قورىقتار مەن ورمان شارۋاشىلىعى مەكەمەلەرىنە زاماناۋي ارنايى تەحنيكا ساتىپ الۋعا ۋتيل تولەمىنەن 33 121 711 000 تەڭگە جۇمسالدى»، — دەپ حابارلادى «جاسىل دامۋ» اق.
ەڭ ءىرى جەتكىزىلىمدەر شىعىس قازاقستان، اقمولا، پاۆلودار جانە قوستاناي وبلىستارىنا، سونداي-اق اباي جانە سولتۇستىك قازاقستان وبلىستارىنا جاسالدى. بۇل ايماقتارعا 24 ملرد تەڭگەدەن استام قارجى ءبولىندى.
كومپانيانىڭ دەرەگىنشە، جاڭا تەحنيكا ايماقتاردا ءقازىردىڭ وزىندە قولدانىلىپ جاتىر. ول ورمان القاپتارىن پاترۋلدەۋگە، ءورت ءسوندىرۋ بريگادالارىن جەدەل جەتكىزۋگە جانە تابيعي ورتتەردى سوندىرۋگە ارنالعان.
تەحنيكا ساتىپ الۋ «تازا قازاقستان» ەكولوگيالىق باستاماسى اياسىندا ەكولوگيا جانە تابيعي رەسۋرستار مينيسترلىگىنىڭ قولداۋىمەن جۇزەگە اسىرىلۋدا.
بۇعان دەيىن «كۋرسيۆ» 2025 جىلدىڭ قورىتىندىسى بويىنشا «جاسىل دامۋ» اق 39،5 ملرد تەڭگە تازا پايدا تاپقانىن، بۇل وتكەن جىلعى كورسەتكىشتەن جوعارى ەكەنىن جازعان بولاتىن. بۇل سومانىڭ 27،6 ملرد تەڭگەسى، ياعني پايدانىڭ 70%-ى ديۆيدەند رەتىندە رەسپۋبليكالىق بيۋدجەتكە باعىتتالعان. كومپانيا وندىرۋشىلەر مەن يمپورتتاۋشىلاردىڭ كەڭەيتىلگەن مىندەتتەمەلەرىنىڭ ءبىرىڭعاي مەملەكەتتىك وپەراتورى بولىپ تابىلادى جانە ۋتيل تولەمدەرىن جيناۋدى اكىمشىلەندىرەدى.