كولۋمبيا ۋنيۆەرسيتەتىنىڭ زەرتتەۋشىلەرى ۇيقىنىڭ وڭتايلى ۇزاقتىعىنان اۋىتقۋ ميدىڭ، جۇرەكتىڭ جانە وكپەنىڭ بيولوگيالىق قارتايۋىن تەزدەتەتىنىن انىقتادى. تۇنگى دەمالىستىڭ وڭتايلى ۇزاقتىعى 6،4-تەن 7،8 ساعاتقا دەيىن، دەپ حابارلايدى infohub.kz سايتى.
راديولوگيا دوسەنتى سزيۋنحاو ۆەننىڭ جەتەكشىلىگىمەن عىلىمي توپ بريتاندىق بيوبانككە قاتىسقان شامامەن 500 مىڭ ادامنىڭ دەرەكتەرىن تالدادى. ماماندار ماشينالىق وقىتۋ ادىستەرىن قولدانا وتىرىپ، 17 اعزا جۇيەسى ءۇشىن 23 ءتۇرلى «بيولوگيالىق ساعاتتى» زەرتتەدى. ولار قان اناليزىندەگى اقۋىز ماركەرلەرىن، توموگرافيا ناتيجەلەرىن جانە مەتابوليكالىق كورسەتكىشتەردى پايدالاندى.
تالداۋ ۇيقى ۇزاقتىعى مەن اعزا جاعدايى اراسىنداعى Uء-تارىزدى تاۋەلدىلىكتى انىقتادى. تاۋلىگىنە التى ساعاتتان از نەمەسە سەگىز ساعاتتان كوپ ۇيىقتايتىن ادامداردا اعزالاردىڭ بيولوگيالىق قارتايۋ كورسەتكىشتەرى ەڭ جوعارى بولدى. قارتايۋدىڭ ەڭ باياۋ قارقىنى 6،4-تەن 7،8 ساعاتقا دەيىن ۇيىقتاعاندا بايقالدى.
ۇيقىنىڭ جەتىسپەۋشىلىگى دەپرەسسيانىڭ، دەپرەسسيالىق بۇزىلۋلاردىڭ، سەمىزدىكتىڭ، ەكىنشى ءتيپتى قانت ديابەتىنىڭ جانە گيپەرتونيانىڭ دامۋىمەن تىعىز بايلانىستى بولىپ شىقتى. ال قىسقا دا، تىم ۇزاق ۇيقى استمامەن، وكپەنىڭ سوزىلمالى وبسترۋكتيۆتى اۋرۋىمەن جانە اس قورىتۋ جۇيەسىنىڭ بۇزىلۋىمەن بايلانىستى بولدى.