ۇزاق REM-ۇيقى فازاسى 80-نەن استام ءتۇرلى اۋرۋدىڭ دامۋ ءقاۋپىن ازايتادى — وسىنداي تۇجىرىمعا «PLOS Medicine» جۋرنالىندا جاريالانعان اۋقىمدى زەرتتەۋ اۆتورلارى كەلدى. بۇل تۋرالى Medical News Today جازادى، دەپ حابارلايدى infohub.kz سايتى.
زەرتتەۋدە UK Biobank دەرەكقورىنداعى 95 559 ەرەسەك ۇلىبريتانيا تۇرعىنىنىڭ مەديسينالىق كورسەتكىشتەرى تالداندى. قاتىسۋشىلاردىڭ ورتاشا جاسى 56،2 جاستى قۇرادى. ۇيقى ساپاسىن باعالاۋ ءۇشىن ەرىكتىلەر ءبىر اپتا بويى بىلەگىنە اكسەلەرومەتر تاعىپ ءجۇردى — بۇل ۇيقىنىڭ ءارتۇرلى فازالارىنىڭ ۇزاقتىعىن دالىرەك باقىلاۋعا جانە وزدىگىنەن جۇرگىزىلگەن ساۋالنامالارعا ءتان قاتەلىكتەردەن اۋلاق بولۋعا مۇمكىندىك بەردى.
سودان كەيىن عالىمدار قاتىسۋشىلاردىڭ دەنساۋلىق جاعدايىن ورتا ەسەپپەن 8،9 جىل بويى باقىلادى. تالداۋ ۇزاق REM-ۇيقى فازاسى جۇرەك جەتكىلىكسىزدىگى، جۇرەكتىڭ يشەميالىق اۋرۋى، دەمەنسيا جانە شاشىراڭقى سكلەروزدى قوسا العاندا، 83 اۋرۋدىڭ ءقاۋپىن ازايتاتىنىن كورسەتتى. ءوز كەزەگىندە، تەرەڭ ۇيقى ۇزاقتىعىنىڭ ارتۋى 2 ءتيپتى قانت ديابەتى، اۋىر دەپرەسسيالىق بۇزىلىس، ۇيقى اپنوەسى جانە پاركينسون اۋرۋى سياقتى جەتى پاتولوگيانىڭ دامۋ ىقتيمالدىعىنىڭ تومەندەۋىمەن بايلانىستى بولدى.
زەرتتەۋشىلەر سونداي-اق ۇيقىنىڭ وڭتايلى جالپى ۇزاقتىعى تاۋلىگىنە 6-8 ساعاتتى قۇرايتىنىن انىقتادى. سونىمەن قاتار، تۇندە ءجيى ويانۋ جانە تۇراقسىز ۇيقى كەستەسى مازاسىزدىق جاعدايلارىنىڭ، دەپرەسسيانىڭ جانە ءىشتىڭ اۋىرۋىنىڭ پايدا بولۋ ىقتيمالدىعىن ارتتىردى.
جۇمىس اۆتورلارى الىنعان ناتيجەلەر ۇيقى قۇرىلىمىنىڭ ادامنىڭ ۇزاق مەرزىمدى دەنساۋلىعىنا اسەرىن دالىرەك انىقتاۋعا كومەكتەسەتىنىن اتاپ ءوتتى.