سانيتاريالىق-ەپيدەميولوگيالىق باقىلاۋ كوميتەتى ەلدىڭ باس سانيتارلىق دارىگەرىنىڭ جاڭا قاۋلىسىن جاريالادى، وعان سايكەس تۇماۋعا قارسى ەگۋ 15 قىركۇيەكتە باستالادى، دەپ حابارلايدى infohub.kz سايتى.
قۇجاتتا سوزىلمالى اۋرۋلارى بار ادامدارعا، مەكتەپ وقۋشىلارىنا، جۇكتى ايەلدەرگە، قارت ادامدارعا، كىشكەنتاي بالالارعا، سونداي-اق جابىق مەكەمەلەردە جانە ارناۋلى الەۋمەتتىك قىزمەت ۇيىمدارىندا جۇرگەن ادامدارعا ەگۋ ۇسىنىلاتىنى كورسەتىلگەن.
باس سانيتارلىق دارىگەر استانا، وبلىستار جانە رەسپۋبليكالىق ماڭىزى بار قالالاردىڭ جەرگىلىكتى مەملەكەتتىك دەنساۋلىق ساقتاۋ باسقارمالارىنىڭ باسشىلارىنا 15 قىركۇيەكتەن باستاپ مەديسينالىق ۇيىمداردىڭ تۇماۋعا قارسى يممۋنداۋعا دايىندىعىن قامتاماسىز ەتۋدى، 3 قىركۇيەككە دەيىن ەگىلۋگە جاتاتىن ادامداردىڭ ءتىزىمىن دايىنداۋدى، ۆاكسينانى ساقتاۋ جانە تاسىمالداۋ تالاپتارىن ساقتاۋدى، ەگۋ كابينەتتەرى مەن بريگادالاردى دايىنداۋدى، سونداي-اق 1 قازاننان باستاپ ەمحانالاردا مەديسينا قىزمەتكەرلەرى ءۇشىن ماسكا رەجيمىن ەنگىزۋدى تاپسىردى.
قاۋلىدا ەگۋ ادامنىڭ اقپاراتتاندىرىلعان كەلىسىمى الىنعاننان كەيىن جۇرگىزىلەتىنى جەكە اتاپ وتىلگەن. سونىمەن قاتار، 1 قىركۇيەكتەن باستاپ جرۆي، تۇماۋ جانە COVID-19 سىرقاتتانۋشىلىعىنىڭ مونيتورينگى اپتا سايىن، ال 1 قازاننان باستاپ كۇن سايىن جۇرگىزىلەتىن بولادى.