شەتەل ۆاليۋتاسىنداعى جيناق دەپوزيتتەرى بويىنشا ەڭ جوعارى مولشەرلەمە جىلدىق 2،5%-عا دەيىن كوتەرىلەدى. الايدا جاڭا شارتتارمەن سالىم اشۋ 1 قازاننان باستاپ قانا مۇمكىن بولادى. بۇل تۋرالى قازاقستاننىڭ دەپوزيتتەرگە كەپىلدىك بەرۋ قورى حابارلادى، دەپ جازادى infohub.kz سايتى.
قازاقستاننىڭ دەپوزيتتەرگە كەپىلدىك بەرۋ قورىنىڭ (قدكق) تۇسىندىرۋىنشە، 1 قازاننان باستاپ جەكە تۇلعالاردىڭ شەتەل ۆاليۋتاسىنداعى دەپوزيتتەرى بويىنشا مولشەرلەمەلەردى رەتتەۋدى ىرىقتاندىرۋ باستالادى. بۇعان دەيىن مۇنداي سالىمداردىڭ بارلىق ءتۇرى بويىنشا مولشەرلەمە 1%-دان اسپاۋعا ءتيىس ەدى.
ەندى مەرزىمى 12 ايدان اساتىن جيناق دەپوزيتتەرى بويىنشا مولشەرلەمە جىلدىق 1%-دان 2،5%-عا دەيىن كوتەرىلۋى مۇمكىن. ءسوز قاراجاتتى مەرزىمىنەن بۇرىن الۋعا قاتاڭ شەكتەۋ قويىلعان — ءتىپتى بارلىق سىياقىدان ايىرىلۋعا دەيىنگى سالىمدار تۋرالى بولىپ وتىر. جاڭا مولشەرلەمەلەر تەك 2026 جىلعى 1 قازاننان باستاپ اشىلعان نەمەسە ۇزارتىلعان دەپوزيتتەرگە قولدانىلادى.
اتالعان مولشەرلەمەلەر شەتەل ۆاليۋتاسىنداعى دەپوزيتتەر ءۇشىن ۇسىنىلاتىن جوعارعى شەك بولىپ سانالادى. بانكتەر قانداي مولشەرلەمە بەلگىلەۋدى وزدەرى تاڭدايدى. سونىمەن قاتار كەز كەلگەن مەرزىمدەگى مەرزىمدى سالىمدار، سونداي-اق مەرزىمى 12 اي جانە ودان قىسقا جيناق دەپوزيتتەرى بويىنشا شەكتى مولشەرلەمەلەر وزگەرىسسىز قالادى — 1%.
قدكق سونداي-اق جەكە تۇلعالاردىڭ شەتەل ۆاليۋتاسىنداعى سالىمدارى بويىنشا ەڭ جوعارى كەپىلدىك 5 ملن تەڭگەگە دەيىن ەكەنىن ەسكە سالدى.
ەسكە سالايىق، 21 قىركۇيەكتە ۇلتتىق بانك ءتوراعاسىنىڭ ورىنباسارى ءاليا مولدابەكوۆا سۇحبات بارىسىندا تەڭگەنىڭ نىعايۋى جانە ۆاليۋتالىق سالىمدار ۇلەسىنىڭ ازايۋى ۆاليۋتالىق دەپوزيتتەر بويىنشا مولشەرلەمەلەردى كەزەڭ-كەزەڭىمەن ىرىقتاندىرۋعا كىرىسۋگە مۇمكىندىك بەرەتىنىن ايتقان بولاتىن.
كەيىنىرەك ساراپشىلار «كۋرسيۆكە» بانكتەر ۆاليۋتالىق دەپوزيتتەر بويىنشا مولشەرلەمەلەردى كوتەرۋگە اسىقپايتىنىن ايتتى.