قازاقستاننىڭ جوعارى اۋديتورلىق پالاتاسى ەلدە قۇرامانى ەرىپ جۇرەتىن «ارتىق ادامدارعا» قاتىستى ءنورماتيۆتىڭ ەنگىزىلگەنىن ەسكە سالدى، دەپ حابارلايدى infohub.kz سايتى.
ۆاپ ءباسپاسوز قىزمەتىنىڭ مالىمەتىنشە، جۇرگىزىلگەن اۋديتتەن كەيىن «ارتىق ەرىپ جۇرۋشىلەرسىز» قاعيداتى بويىنشا سپورتتىق دەلەگاسيالار تۋرالى جاڭا نورماتيۆ بەكىتىلدى. بۇل ءنورماتيۆتى ق ر تۋريزم جانە سپورت مينيسترلىگى بەكىتكەن.
قۇجات قازاقستاندىق سپورتشىلاردى كەشەندى جارىستاردا ەرىپ جۇرەتىن دەلەگاسيالار قۇرامىن رەتتەيتىنى حابارلاندى. وعان توكيوداعى 2020 جىلعى وليمپيادا ويىندارىنا دايىندىققا بولىنگەن بيۋدجەت قاراجاتىن پايدالانۋ تيىمدىلىگىنە جۇرگىزىلگەن مەملەكەتتىك اۋديت نەگىز بولدى.
«تەكسەرۋ بارىسىندا ۇلتتىق دەلەگاسيانى قالىپتاستىرۋ كەزىندە بەكىتىلگەن باعداردىڭ جوقتىعى انىقتالدى: ءبىر سپورتشىعا قانشا جاتتىقتىرۋشى، دارىگەر، ماسساجيست، پسيحولوگ، شتاب وكىلدەرى مەن لاۋازىمدى تۇلعالار تيەسىلى بولۋى كەرەك. ەرىپ جۇرەتىن پەرسونال سانى ءار جاعدايدا جەكە انىقتالدى، ءبىرىڭعاي ادىستەمەلىك نەگىز بولمادى، بۇل ولاردىڭ ءىسساپار شىعىندارىنىڭ نەگىزدىلىگىن باعالاۋعا مۇمكىندىك بەرمەدى»، — دەپ اتاپ ءوتتى ۆاپ-تا.
ەندى دەلەگاسيالار قۇرامى ناقتى بەلگىلەنگەن پروپورسيالار بويىنشا قالىپتاستىرىلادى، بۇل شىعىنداردى بولجامدى جانە تەكسەرىلەتىن ەتەدى. بۇل رەتتە سپورتشىلارمەن تىكەلەي جۇمىس ىستەيتىن جاتتىقتىرۋشىلار مەن مەديسينالىق بلوك ماماندارىنا باسىمدىق بەرىلەدى.
«جالپى، قابىلدانعان شارا بيۋدجەت شىعىندارىنىڭ اشىقتىعىن ارتتىرۋعا، ولاردى باقىلاۋدى كۇشەيتۋگە جانە سپورتتىق دەلەگاسيالارعا نەگىزسىز شىعىندار تاۋەكەلىن ازايتۋعا مۇمكىندىك بەرەدى»، — دەپ قوستى ۆاپ-تا.
وسى جىلدىڭ اقپان ايىندا قازاقستاننىڭ تۋريزم جانە سپورت ءمينيسترى ەربول مىرزابوسىنوۆ يتالياداعى 2026 جىلعى قىسقى وليمپيادا ويىندارىنا قاتىسۋشىلاردى ەرىپ جۇرگەن دەلەگاسيا تۋرالى پىكىر بىلدىرگەن ەدى. ول «ول جاققا بىردە-بىر ارتىق ادام بارماعانىن» مالىمدەدى.