ۆەنەسۋەلادا 24 ماۋسىمدا بولعان ەكى قۋاتتى جەر سىلكىنىسىنەن قازا تاپقاندار سانى 5069 ادامعا جەتتى. بۇل تۋرالى 17 شىلدەدە ەلدىڭ ۇلتتىق اسسامبلەياسىنىڭ ءتوراعاسى حورحە رودريگەس مالىمدەدى، دەپ حابارلايدى infohub.kz سايتى.
سوڭعى مالىمەتتەر بويىنشا، 16 740 ادام جاراقات الدى، تاعى 17 907 تۇرعىن باسپاناسىز قالدى. ىزدەستىرۋ-قۇتقارۋ وپەراسياسى كەزىندە 6462 ادام تابىلدى، ال 37 مىڭعا جۋىق زارداپ شەككەنگە مەديسينالىق كومەك كورسەتىلدى.
ستيحيا 190 عيماراتتى تولىعىمەن قيراتتى، تاعى 856 نىسان قاتتى زاقىمداندى. ەڭ اۋىر زارداپتار ەلدىڭ جاعالاۋ ايماقتارىنا ءتيدى، وندا قازا تاپقانداردىڭ كوپشىلىگى تىركەلگەن.
ۇيلەرىنەن ايىرىلعان مىڭداعان ادام ۋاقىتشا لاگەرلەردە قالۋدا. AFP اقپاراتىنا سايكەس، ولاردىڭ كوبى تولىپ، اۋىز سۋ مەن سانيتارلىق جاعدايلاردىڭ تاپشىلىعىن سەزىنۋدە.
اپاتتى «سەيسميكالىق دۋپلەت» دەپ اتالاتىن قۇبىلىس تۋدىردى — 24 ماۋسىم كەشىندە ءبىر مينۋتتان از ۋاقىت ارالىعىمەن بولعان ماگنيتۋداسى 7،2 جانە 7،5 بولاتىن ەكى قۋاتتى جەر سىلكىنىسى. ەكى ءدۇمپۋدىڭ دە ەپيسەنترلەرى كاريب جاعالاۋىنداعى مورون قالاسىنىڭ ماڭىندا، كاراكاستان شامامەن 168 شاقىرىم جەردە ورنالاسقان.
تابيعي اپاتتىڭ زارداپتارىن جويۋ ءۇشىن ۆەنەسۋەلا بيلىگى حالىقارالىق ۆاليۋتا قورىنداعى ءوز رەسۋرستارىن پايدالانىپ، 346 ميلليون دوللار ءبولدى.
ەسكە سالايىق، 1 شىلدەدە ۆەنەسۋەلا پرەزيدەنتىنىڭ مىندەتىن اتقارۋشى دەلسي رودريگەس ەلدە جەر سىلكىنىسى قۇرباندارىنا ارنالعان جەتى كۇندىك ۇلتتىق ازا تۇتۋدى جاريالاعان بولاتىن. سول كەزدە رەسمي قازا تاپقاندار سانى شامامەن 2300 ادامدى قۇراعان ەدى، الايدا قۇتقارۋ جۇمىستارى جۇرگىزىلگەن سايىن بۇل كورسەتكىش ەكى ەسەدەن استامعا ءوستى.