ۆەنەسيا بيلىگى ءبىر كۇنگە كەلەتىن تۋريستەر ءۇشىن تاريحي بولىككە كىرۋ اقىسىن ايتارلىقتاي كوتەرۋدى قاراستىرىپ جاتىر. 2027 جىلدان باستاپ «كىرۋ بيلەتىنىڭ» باعاسى قازىرگى 5–10 ەۋرودان (2،5–5 مىڭ تەڭگە) 30–50 ەۋروعا (15–25 مىڭ تەڭگە) دەيىن ءوسۋى مۇمكىن، دەپ حابارلايدى infohub.kz سايتى.
بۇل باستامانى قالا اكىمدىگىنىڭ بيۋدجەت جونىندەگى كەڭەسشىسى ميكەلە زۋين ۇسىندى. Gazzettino باسىلىمىنا بەرگەن سۇحباتىندا ول شارانىڭ نەگىزگى ماقساتى — قالاعا از ۋاقىتقا كەلىپ، ينفراقۇرىلىمعا شامادان تىس سالماق سالاتىن «ءبىر كۇندىك تۋريستەر» اعىنىن شەكتەۋ ەكەنىن ءتۇسىندىردى.
«ۇكىمەتتەن كىرۋ اقىسىن جوعارىلاتۋدى سۇراۋ — پايدا تابۋ ءۇشىن ەمەس. ماسەلە مىنادا: قازىرگى 5–10 ەۋرونى كەز كەلگەن ادام تولەي الادى. بۇل شارا بەرەتىن تەجەۋشى اسەردىڭ جوعالۋ ءقاۋپى بار»، — دەپ كەلتىرەدى ءزۋيننىڭ ءسوزىن Il Fatto Quotidiano.
ەكسپەريمەنتتىك كەزەڭ اياقتالعان سوڭ، تولەم جۇيەسى 2027 جىلى تۇراقتى سيپاتقا يە بولادى. بيلىك تەك باعانى قايتا قاراۋدى عانا ەمەس، كىرۋ اقىسى تولەنەتىن كۇندەر كۇنتىزبەسىن دە كەڭەيتۋدى جوسپارلاپ وتىر.
زۋين تۋريستەر ءۇشىن قالاعا «كىرۋدىڭ» تۇپكىلىكتى باعاسى ورتالىق ۇكىمەتپەن كەلىسىلۋى ءتيىس ەكەنىن اتاپ ءوتتى.