ۆەنگريادا 24 جاستاعى ەر ادام ماس كۇيىندە جەڭىل ۇشاقتى ۇرلاپ، «پاكش» اتوم ەلەكتر ستانسياسىنا بەت الدى. اسكەريلەر اۋە كەمەسىن ۇستاۋ ءۇشىن ەكى جويعىش ۇشاقتى كوتەردى، دەپ حابارلايدى infohub.kz سايتى.
وقيعا 29 تامىزدا تاڭەرتەڭ بولدى. ەر ادام كالوچا قالاسىنداعى اەرودرومدا تۇرعان ۇشاققا رۇقساتسىز وتىرىپ، ۆەنگرياداعى جالعىز اەس ورنالاسقان پاكش قالاسىنا قاراي ۇشتى.
اسكەري رادارلار اۋە كەمەسىن بىردەن انىقتادى. وسىدان كەيىن كەزەكشىلىكتەگى Gripen جويعىش ۇشاقتارى اۋەگە كوتەرىلدى، دەدى ۆەنگريانىڭ قورعانىس ءمينيسترى.
«پاكش» اەس-ىنەن ءۇش شاقىرىم راديۋستاعى اۋە كەڭىستىگى ازاماتتىق اۆياسيا ءۇشىن 6 مىڭ مەتر بيىكتىككە دەيىن جابىق. ۆەنگريالىق ب ا ق دەرەكتەرىنە سايكەس، ۇرلانعان ۇشاق ستانسيا ماڭىندا ءقاۋىپتى مانەۆرلەر جاساعان.
بىرنەشە مينۋتتان كەيىن ول گەرەن ەلدى مەكەنىنىڭ جانىنداعى كۇنباعىس القابىنا ءماجبۇرلى قونۋ جاسادى. ەر ادام زاقىمدالعان ۇشاقتى تاستاپ، تاس جولعا شىققان.
ۆەنگريا پوليسياسىنىڭ حابارلاۋىنشا، ءبىر اۆتوكولىك جۇرگىزۋشىسى ەر ادامعا كومەكتەسۋ ءۇشىن توقتاعان. ول كولىككە وتىرىپ، كەتۋگە تىرىسقان، الايدا ىشىندەگى جولاۋشى وعان كەدەرگى جاساعان.
پوليسيا كۇدىكتىنى بىرنەشە مينۋت ىشىندە ۇستادى. تەكسەرۋ ەر ادامنىڭ ماس كۇيىندە بولعانىن راستادى. قۇقىق قورعاۋ ورگاندارى ونىڭ باسقا دا زاتتاردى قولدانعانىن انىقتاپ جاتىر.
ۇستالعان ادامعا قاتىستى كولىك قۇرالىن زاڭسىز يەمدەنۋ جانە باسقا دا بولجامدى قىلمىستار بويىنشا ءىس قوزعالدى. پوليسيا ونى قاماۋعا الۋدى سۇراماق.
وقيعادان كەيىن پوليسيا اۆياسيالىق ورگاندارمەن بىرلەسىپ، كالوچاداعى اەرودرومدا تەكسەرۋ باستادى. ۆەنگريانىڭ باسقا اۋەجايلارىندا دا وسىنداي تەكسەرۋلەر جۇرگىزۋ جوسپارلانۋدا.