ۆەتنام بيلىگى افريكادان زاڭسىز اكەلىنگەن ءپىل سۇيەگىنىڭ ءىرى پارتياسىن تاركىلەگەنىن حابارلادى. ۆەتنام اقپارات اگەنتتىگىنىڭ مالىمەتىنشە، 221 دانا ءپىل سۇيەگىنىڭ جالپى سالماعى 1193 كەلىنى قۇرايدى. ولار سارسەنبى كۇنى گيا لاي پروۆينسياسىنداعى كۋي نون پورتىندا كورسەتىلدى.
ۆەتنام – جابايى جانۋارلاردىڭ ءتىرى جانە ءولى كۇيىندە زاڭسىز ساۋداسىنىڭ ءىرى ورتالىعى. كونتراباندالىق جۇكتىڭ كوپ بولىگى قىتايعا جونەلتىلەدى، ءبىراق ۆەتنامنىڭ وزىندە دە، باسقا وڭتۇستىك-شىعىس ازيا ەلدەرىندە دە سۇرانىس بار.
بەيسەنبىدەگى حابارلارعا سايكەس، وتكەن اپتادا جۇرگىزىلگەن تەكسەرۋ كەزىندە ءپىل سۇيەكتەرى 9 شىلدەدە كەلگەن ءۇش كونتەينەردەگى اعاش ماتەريالداردىڭ اراسىندا جاسىرىلعانى انىقتالدى.
زاڭسىز جۇكتە سونداي-اق جولبارىس سياقتى ءىرى مىسىق تۇقىمداستارعا جاتاتىن جانۋارلاردىڭ 79،3 كەلى سۇيەگى بولعان. ۇساقتالعان جانۋار سۇيەكتەرى ءداستۇرلى جۇڭگو مەديسيناسىندا قولدانىلادى.
Tuoi Tre گازەتىنىڭ سايتىنا سايكەس، گيا لاي پروۆينسيالىق پوليسياسى جۇكتىڭ كونگو رەسپۋبليكاسىنان جونەلتىلگەنىن مالىمدەدى. كەدەندىك باقىلاۋ كەزىندە كونتراباندا انىقتالعان سوڭ، قورعالاتىن جانۋارلارعا قاتىستى ەرەجەلەردى بۇزۋ فاكتىسى بويىنشا قىلمىستىق ءىس قوزعالدى.
ءپىل سۇيەگى مەن باسقا دا جويىلىپ بارا جاتقان جانۋارلاردان الىناتىن ونىمدەردىڭ ساۋداسىنىڭ كوپ بولىگىنە CITES (جابايى فاۋنا مەن فلورانىڭ جويىلىپ بارا جاتقان تۇرلەرىمەن حالىقارالىق ساۋدا تۋرالى كونۆەنسيا) حالىقارالىق كەلىسىمىمەن تىيىم سالىنعان. بۇۇ-عا مۇشە ەلدەردىڭ بارلىعى دەرلىك وسى كەلىسىمگە قوسىلعان.
بۇل پارتيا كۋي نون پورتىندا تاركىلەنگەن ەڭ ءىرى جۇك بولىپ سانالعانىمەن، سوڭعى ونجىلدىقتا دانانگ پەن حايفون پورتتارىندا ءارقايسىسى جەتى توننادان اساتىن بىرنەشە ءىرى پارتيا تاركىلەنگەن بولاتىن.