امەريكالىق اكتەر ۆين ديزەل «فورساج» فرانشيزاسىنىڭ قورىتىندى ءبولىمىنىڭ سەناريىن وقىپ، كوز جاسىن تىيىپ وتىرا الماعانىن ايتتى. ول بۇل ەموسيالارىمەن لوس-اندجەلەستە سەريانىڭ 25 جىلدىعىنا وراي ۇيىمداستىرىلعان العاشقى ءفيلمنىڭ ارنايى كورسەتىلىمىندە ءبولىستى، دەپ حابارلايدى infohub.kz سايتى.
ديزەلدىڭ ايتۋىنشا، «فورساج ناۆسەگدا» ءفيلمىنىڭ سەناريى شامامەن ءتورت جىل بويى جازىلعان جانە وعان بىرنەشە سەناريست توبى قاتىسقان. اكتەر سوڭعى نۇسقا تاريحتىڭ لايىقتى اياقتالۋى بولعانىن مويىندادى.
«ءتورت جىل بويى ءبىز كوپ جۇمىس ىستەگەن سەناريدىڭ سوڭىنا جەتكەندە، مەن جىلادىم. ءوزىمدى تىيىپ وتىرا المادىم»، — دەپ ديزەلدىڭ ءسوزىن باسىلىم كەلتىردى.
قورىتىندى ءفيلمنىڭ ءتۇسىرىلىمىن 2026 جىلدىڭ جەلتوقسانىندا باستاۋ جوسپارلانۋدا. بۇل نەگىزگى سەرياداعى ونىنشى ءارى سوڭعى فيلم بولادى، ال ونىڭ تۇساۋكەسەرى 2028 جىلدىڭ 17 ناۋرىزىنا بەلگىلەنگەن.
«فورساج 10» ءفيلمىن تۇسىرگەن جانە فينالدىڭ رەجيسسەرى رەتىندە جاريالانعان لۋي لەتەرە ازىرگە سەناريدى وقىماعانىن مويىندادى. الايدا ول فرانشيزانىڭ فينالى بولاتىنىن بىلەدى جانە ونى تاماشا دەپ اتايدى.
ەسكە سالايىق، العاشقى «فورساج» 2001 جىلى جارىققا شىققان جانە بۇكىل سەريا بويى ۆين ديزەل باستى ءرول — دومينيك تورەتتونى سومداپ كەلەدى.
بۇعان دەيىن NBC Universal «فورساج» الەمى بويىنشا ءتورت سەريال دايىنداپ جاتقانى، ولار Peacock ستريمينگتىك سەرۆيسىندە كورسەتىلەتىنى حابارلانعان بولاتىن.