اقش-تىڭ ۆيردجينيا شتاتىنداعى نورفولك قالاسىنداعى Walmart دۇكەنىندە 77 جاستاعى ساتىپ الۋشى 17 جاستاعى قىزمەتكەردىڭ اتا-اناسىنىڭ شابۋىلىنان كەيىن قازا تاپتى. بۇل تۋرالى امەريكالىق بۇقارالىق اقپارات قۇرالدارى حابارلايدى، دەپ جازادى infohub.kz سايتى.
بەرت اتيەنزا 8 ماۋسىمدا باس سۇيەگىنىڭ جابىق جاراقاتىنان قايتىس بولدى. ول ۆيردجينيا شتاتىنىڭ نورفولك قالاسىنداعى Walmart دۇكەنىندە بولعان شابۋىلدان ءبىر كۇن وتكەن سوڭ كوز جۇمدى. بۇل تۋرالى WTKR تەلەارناسى دۇيسەنبىدە حابارلادى. وقيعا دۇكەننىڭ باقىلاۋ كامەرالارىنا ءتۇسىپ قالعان.
پوليسيا 7 ماۋسىمدا ساعات 15:20 شاماسىندا دۇكەنگە شابۋىل تۋرالى حابارلاما بويىنشا كەلدى. اتيەنزانىڭ 42 جىل بىرگە ءومىر سۇرگەن ايەلى دجوزەفين شابۋىلدان كەيىن جارالانعان كۇيەۋىن قۇشاقتاپ، ەدەندە وتىرىپ قالعان. وقيعا ورنىنان تۇسىرىلگەن بەينەجازبادا وسى ءسات كورىنەدى.
«كۇيەۋىم ءالى سويلەي الاتىن، ول ماعان “تۇرۋعا كومەكتەس” دەدى. ءبىراق مەن “جوق، قانىڭ اعىپ جاتىر. اۋزىڭنان قان كەتىپ جاتىر. جەدەل جاردەم كەلە جاتىر” دەدىم. قايتا قاراسام، ول ەسىنەن تانىپ قالعان»، — دەپ ايتتى دجوزەفين.
اتيەنزا ەسىنەن تانىپ، اۋرۋحاناعا جەتكىزىلدى، الايدا كەلەسى كۇنى العان جاراقاتتارىنان قايتىس بولدى. مەديسينالىق ساراپشىلار ءولىم سەبەبىن دەنە جاراقاتىنان تۋىنداعان قاساقانا كىسى ءولتىرۋ دەپ تانىدى.
جانجال اتيەنزا مەن ايەلى تاڭەرتەڭ شىركەۋدە بولىپ، ازىق-ت ۇلىك ساتىپ الۋ كەزىندە باستالدى. دجوزەفيننىڭ ايتۋىنشا، 17 جاستاعى Walmart قىزمەتكەرى جۇپ ساتىپ الىپ جاتقان دالىزگە جىلدام كىرىپ، ايەلدى اربامەن سوعىپ كەتە جازداعان. اتيەنزا مەن ەسىمى جاسىرىلعان قىزمەتكەر اراسىندا سوزگە كەلىسپەۋشىلىك تۋىنداعان. جۇپ كەتىپ بارا جاتقاندا، قىزمەتكەر ولارعا قاراي بانكا لاقتىرعان.
كەيىن ءجاسوسپىرىم اتا-اناسى ترەۆيس ۋايت پەن ەريكا ميچەللگە قوڭىراۋ شالعان. ولار بىرنەشە مينۋتتان كەيىن دۇكەنگە كەلىپ، جۇپتى ىزدەي باستاعان. دۇكەننىڭ باقىلاۋ كامەراسىندا اتيەنزا سورەلەردەگى زاتتاردى قاراپ تۇرعاندا، ۋايت پەن ميچەلل وعان جاقىنداپ، قىزدارى قاراپ تۇرعان جەردە شابۋىل جاساعانى كورىنەدى.
زەينەتكەردى ارتىنان يتەرىپ، ۇستاپ، جۇدىرىقپەن ۇرعان. ول سورەگە سوعىلىپ، ەدەنگە قۇلاعان. سودان كەيىن كۇدىكتىلەردىڭ ءبىرى ونى تەپكەن. اينالاداعى ادامدار بۇل كورىنىستەن الىستاپ كەتكەن.
44 جاستاعى ۋايت پەن 42 جاستاعى ميچەلل بىرنەشە كۇننەن كەيىن قاماۋعا الىنىپ، نورفولك تۇرمەسىندە كەپىلسىز ۇستالىپ وتىر. ولاردىڭ ءجاسوسپىرىم قىزى دا شابۋىل جاساۋ، اۋىر دەنە جاراقاتىن سالۋ جانە قىلمىس جاساۋعا ءسوز بايلاسۋ ايىپتارىمەن ايىپتالدى. بۇل تۋرالى WAVY تەلەارناسى حابارلادى. ول نورفولكتەگى كامەلەتكە تولماعانداردى ۇستاۋ ورتالىعىندا ۇستالىپ وتىر. بيلىك ونىڭ ەسىمىن كامەلەتكە تولماعانى ءۇشىن جاريالامادى.