ۆيسكونسين شتاتىنىڭ سولتۇستىك-شىعىسىنداعى قاتتى تورنادودان كەيىن قۇتقارۋشىلار ۇيىندىلەردى ارالاپ، زارداپ شەككەندەردى ىزدەستىرۋدە. اپپلتون، مەناشا جانە نينا قالالارىن قامتيتىن «فوكس-سيتيس» ايماعىنا سوققى بەرگەن داۋىل جۇزدەگەن ءۇيدى قيراتىپ، كولىكتەردى اۋدارىپ، ەلەكتر جەلىلەرى مەن اعاشتاردى قۇلاتىپ كەتتى، دەپ حابارلايدى infohub.kz.
ۋيننەباگو وكرۋگىنىڭ اتقارۋشىسى گوردون حينس سەيسەنبىدەگى ءباسپاسوز ءماسليحاتىندا: «تورنادونىڭ كۇشى مەن اسەرى تاڭعالارلىق، جويقىن. ءبىز ءالى دە جاعدايدى باعالاپ جاتىرمىز»، — دەدى.
مەناشا تۇرعىنى 55 جاستاعى دەۆيد چيۋدىڭ ءۇيىنىڭ شاتىرىن اعاش تەسىپ وتكەن، ال داۋىل اۋلاداعى كرەسلوسىن ۇشىرىپ اكەتىپ، ول ونى تابا الماعان. ونىڭ ايتۋىنشا، كورشىسىنىڭ جاعدايى ودان دا اۋىر: شاتىرىنىڭ ءبىر بولىگى ج ۇلىنىپ، جيھازدارى مەن قابىرعالارى قوپارىلىپ كەتكەن. «بۇل وتە تاڭعالارلىق ەدى»، — دەيدى چيۋ. ول ايەلى مەن ۇلىمەن بىرگە جەرتولەگە جۇگىرىپ ۇلگەرگەن.
قيراۋلار كوپ بولعانىمەن، داۋىلدىڭ كەلۋ ۋاقىتى قازا بولعانداردىڭ بولماۋىنا سەبەپ بولعان. تورنادو تۇستەن كەيىن ەرتە كەلگەن، ادامدار وياۋ بولعان جانە ەسكەرتۋلەر جاسالعان. مەناشا پوليسيا باستىعى مەتت البرەحت: «بارلىعى جۇمىستا ەدى. كۇن ورتاسى بولاتىن. ادامداردىڭ كوبى ۇيدە ەمەس، جۇمىس ورنىندا بولدى»، — دەدى.
ونداعان ادام جاراقات العان. پوليسيا ءبىر كۇن وتسە دە ءۇي-ۇيدى ارالاپ، زارداپ شەككەندەردى ىزدەستىرۋدە. ۇلتتىق اۋا رايى قىزمەتىنىڭ حابارلاۋىنشا، تورنادو ساعات 13:00 شاماسىندا جەرگە ءتيىپ، 20 مينۋتتان استام ۋاقىت جەر بەتىندە بولىپ، شامامەن 19 شاقىرىمدىق جولدى قيراتقان. بۇل ايماق ميلۋوكيدان سولتۇستىك-باتىسقا قاراي 100 شاقىرىم جەردە.
گۋبەرناتور توني ەۆەرس زارداپ شەككەن ايماقتاردا توتەنشە جاعداي جاريالادى. ۇيلەرىنەن ايىرىلعان تۇرعىندارعا ارناپ باسپانالار اشىلدى. اپپلتون مەرى دجەيك ۆۋدفورد ءبىرقاتار اۋدانداردىڭ «شىن مانىندە جويىلعانىن» ايتتى. ايماقتىڭ باسقا جەرلەرىندەگىدەي، ەلەكتر جەلىلەرى سىنعان اعاشتارمەن شىرمالىپ، ەلەكتر قۋاتىن قالپىنا كەلتىرۋ باياۋ جانە ءقاۋىپتى بولىپ وتىر.
ۋيننەباگو جانە وۋتاگەيمي وكرۋگتەرىندە 10 مىڭنان استام تۇتىنۋشى ءالى دە ەلەكتر قۋاتىنسىز. ەلەكتر قۋاتىن تولىق قالپىنا كەلتىرۋ بىرنەشە كۇنگە سوزىلۋى مۇمكىن. اۋا رايى قىزمەتىنىڭ مالىمەتىنشە، تورنادو ۇلى كولدەر ايماعى ارقىلى وتكەن ۇلكەن داۋىل جۇيەسىنەن پايدا بولىپ، جىلۋ مەن ىلعالدىڭ جينالۋىنان كۇشەيگەن.