جاپونيادا ءوتىپ جاتقان ازيا ويىندارىندا ەرلەر ۆولەيبول قۇراماسى 9–12 ورىندار ءۇشىن ماچتا جۇڭگو تايبەيى كومانداسىنان 1:3 ەسەبىمەن جەڭىلدى، دەپ حابارلايدى infohub.kz سايتى.
ءبىرىنشى پارتيانى قازاقستاندىقتار ءساتسىز وتكىزىپ، 11:25 ەسەبىمەن ۇتىلدى. الايدا ەكىنشى سەتتى سەرگەي تريكوز شاكىرتتەرى سەنىمدى ويناپ، 25:23 ەسەبىمەن جەڭىپ الدى. ءبىراق كەشەگى گونكونگپەن ويىننان وزگەشە، ويىن بارىسىن وزگەرتە المادى.
قازاقستان قۇراماسى ساپىندا ۆلاديسلاۆ ماستيحين 16 ۇپاي جينادى، ۆلاديسلاۆ كۋنچەنكو — 11، ازامات سەيلحانوۆ — 10.
ازيا ويىندارى-2026. ۆولەيبول. ەرلەر. 2 قازان. 9–12 ورىندار ءۇشىن ماچ.
قازاقستان – جۇڭگو تايبەيى 1:3 (11:25، 25:23، 21:25، 20:25).
جەڭىلىسكە ۇشىراعان سوڭ، قۇرامامىز سوڭعى ماچتا ازيادانىڭ 11-ورنى ءۇشىن ۆەتناممەن نەمەسە يندونەزيامەن تالاسادى.
ازيا ويىندارىندا ەرلەر ۆولەيبول ءتۋرنيرى 1958 جىلدان بەرى وتكىزىلىپ كەلەدى. ونى جيىرەك جاپوندىقتار جەڭىپ العان. قازاقستان قۇراماسى جۇلدەگەرلەر قاتارىنا ەشقاشان كىرمەگەن.
XX جازعى ازيا ويىندارى رەسمي تۇردە 19 قىركۇيەكتە اشىلىپ، 4 قازاندا اياقتالادى. 45 ەلدىڭ سپورتشىلارى قاتىساتىن جارىستاردا 460 كومپلەكت مەدال ساراپقا سالىنۋدا. ازيادا-2026-دا قازاقستان قۇراماسى ساپىندا 35 سپورت تۇرىنەن 558 سپورتشى سىنعا تۇسۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتيستەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى مما شەبەرى ەركىنعالي بۇركىتالين سالدى. التىنشىنى — ونىڭ ارالاس جەكپە-جەك كومانداسىنداعى جولداسى قادىربەك شىنبايەۆ. 23 قىركۇيەكتە لۋسەنكو اي-2026-نىڭ ەكى دۇركىن چەمپيونى اتاندى. سەگىزىنشى جوعارى دارەجەلى مەدالدى 24 قىركۇيەكتە ەرلەر اراسىنداعى جۇپ ەسكەكتى قايىقتار جارىسىندا ۆلاديسلاۆ ياكوۆليەۆ پەن يۆان چەرنۋحين جەڭىپ الدى. توعىزىنشى التىن مەدالدى 27 قىركۇيەكتە شپاگا شەبەرلەرى كومانداسى يەلەندى. بۇگىن بوكسشى تورەحان سابىرحان ونىنشى التىندى جەڭىپ الدى.
ويىنداردىڭ 12 كۇنىنەن كەيىن قازاقستان بەيرەسمي مەدال ەسەبىندە توعىزىنشى ورىندا تۇر.