2022 جىلى ۆيسكونسين شتاتىندا 10 جاسار قىزدى ولتىرگەن ونىڭ نەمەرە اعاسى ءومىر بويىنا باس بوستاندىعىنان ايىرىلدى. بۇل تۋرالى infohub.kz سايتى حابارلايدى.
2022 جىلدىڭ 24 ساۋىرىندە چيپپەۆا-فولس قالاسىندا ليلي پيتەرس اپايىنىڭ ۇيىنەن ۆەلوسيپەدپەن ۇيىنە قايتىپ كەلە جاتقان. سول كەزدە ونىڭ نەمەرە اعاسى كارسون پيتەرس-بەرگەر ونى جولدان تايىپ، ورماندى ارالاۋعا كوندىرگەن. كەلەسى كۇنى قىزدىڭ دەنەسى تابىلدى. ساراپتاما ونىڭ سوققىعا جىعىلعانىن، تۇنشىقتىرىلعانىن جانە جىنىستىق زورلىققا ۇشىراعانىن كورسەتتى.
قىلمىس كەزىندە كارسون نەبارى 14 جاستا ەدى، ءقازىر ول 18-دە. ول ءليليدىڭ دەنەسى تابىلعاننان كەيىنگى كۇنى قاماۋعا الىندى. سارسەنبىدە چيپپەۆا وكرۋگىنىڭ سۋدياسى ستيۆەن گيببس ونىڭ كىناسىن مويىنداعانىن قابىلداپ، ءومىر بويىنا باس بوستاندىعىنان ايىرۋ ۇكىمىن شىعاردى. كەلىسىم بويىنشا، تاعى ەكى ايىپ — اۋىر دەنە جاراقاتىمەن ءبىرىنشى دارەجەلى جىنىستىق زورلىق جانە 13 جاسقا دەيىنگى بالاعا قاتىستى جىنىستىق زورلىق — الىنىپ تاستالدى.
كارسوننىڭ ادۆوكاتتارى مايكل كوەن مەن اليسيا لينسمايەر ءىستى كامەلەتكە تولماعاندار سوتىنا بەرۋدى سۇراعان. ولاردىڭ پىكىرىنشە، ەرەسەكتەرگە ارنالعان قىلمىستىق سوت جۇيەسىندە كارسون قاجەتتى پسيحيكالىق دەنساۋلىق كومەگىن الا المايدى. الايدا سۋديا بۇل ءوتىنىشتى قابىلداماي، قىلمىستىڭ اۋىرلىعىن العا تارتتى. اپەللياسيالىق سوت تا ءىستى ەرەسەكتەر سوتىندا قاراۋدى جالعاستىردى.