پاۆەل دۋروۆ بەينەسى سالىنعان كىتاپتار، كادەسىيلار جانە باسقا دا تاۋارلار Wildberries پەن Ozon پلاتفورمالارىنان جويىلۋى مۇمكىن. ماركەتپلەيستەر Telegram نەگىزىن قالاۋشىنىڭ رەسەيدە تەرروريستەر مەن ەكسترەميستەر تىزىمىنە ەنگىزىلۋىنە بايلانىستى اسسورتيمەنتتەرىن تەكسەرە باستادى. بۇل تۋرالى تاسس حابارلادى، دەپ جازادى infohub.kz.
رۆب (Wildberries & Russ) بىرىككەن كومپانياسىنىڭ ءباسپاسوز قىزمەتى مۇنداي تاۋارلاردىڭ شەكتەۋلەرگە جاتاتىن-جاتپايتىنىن انىقتاۋ ءۇشىن ىشكى تەرگەۋ جۇرگىزىپ جاتقاندىقتارىن مالىمدەدى. ەگەر بۇزۋشىلىقتار راستالسا، دۋروۆقا قاتىستى تاۋارلاردىڭ كارتوچكالارى بۇعاتتالادى.
Ozon رەسەي زاڭناماسىنا سايكەس ارەكەت ەتەتىنىن اتاپ ءوتتى. ادام نەمەسە ماتەريالدار تەرروريستەر مەن ەكسترەميستەر تىزىمىنە ەنگىزىلگەننەن كەيىن كومپانيا اسسورتيمەنتتى تەكسەرەدى جانە ءتيىستى پوزيسيالاردى جويادى.
«جاقىن ارادا پاۆەل دۋروۆقا تىكەلەي قاتىستى تاۋارلار، ونىڭ ىشىندە كىتاپتار مەن ونىڭ بەينەسى بار ونىمدەر ءبىزدىڭ ۆيترينادان جاسىرىلادى»، — دەپ حابارلادى ماركەتپلەيستىڭ ءباسپاسوز قىزمەتى.
بۇعان دەيىن روسفينمونيتورينگ پاۆەل دۋروۆتى تەرروريستەر مەن ەكسترەميستەر تىزىمىنە ەنگىزگەن بولاتىن. وعان دەيىن رەسەيدە ول تەرروريستىك ارەكەتكە جاردەمدەسۋدە ايىپتالىپ، حالىقارالىق ىزدەۋ جاريالاۋ ءراسىمى باستالعان ەدى.
رەسەي فسب-سىنىڭ مالىمەتىنشە، Telegram اكىمشىلىگى ۆەدومستۆونىڭ ايتۋىنشا تەرروريستىك جانە وزگە دە زاڭسىز ارەكەتتەردى دايىنداۋ مەن ۇيلەستىرۋ ءۇشىن پايدالانىلعان ارنالاردى، چاتتار مەن بوتتاردى جويماعان. روسكومنادزور دا بۇعان دەيىن مەسسەندجەر كومانداسىنا 150 مىڭنان استام تىيىم سالىنعان كونتەنتتى جويۋ تۋرالى تالاپ جىبەرگەنىن، الايدا ولاردىڭ ورىندالماعانىن مالىمدەگەن.