تامبوۆ جانە ماسكەۋ وبلىستارىنداعى Wildberries لوگيستيكالىق ورتالىقتارىنا تۇنگى درون شابۋىلىنان جەتى ادام قازا تاۋىپ، 50-گە جۋىق ادام جاراقات الدى، دەپ حابارلايدى infohub.kz سايتى.
سەنبىگە قاراعان ءتۇنى ۋكراين دروندارى رەسەيدىڭ Wildberries ماركەتپلەيسىنىڭ ەكى ءىرى لوگيستيكالىق ورتالىعىنا — تامبوۆ وبلىسىنىڭ كوتوۆسك قالاسى مەن ماسكەۋ وبلىسىنىڭ ەلەكتروستال قالاسىنا شابۋىل جاسادى. بيلىك وكىلدەرىنىڭ دەرەگىنشە، تامبوۆ ماڭىنداعى قويمانىڭ تۇنگى اۋىسىمدا جۇمىس ىستەگەن جەتى قىزمەتكەرى قازا تاپتى. تامبوۆ وبلىسىنىڭ گۋبەرناتورى ەۆگەني پەرۆىشوۆ 25 ادامنىڭ جاراقات العانىن مالىمدەدى: بىرەۋى وتە اۋىر، التاۋى اۋىر، 16-سى ورتاشا اۋىرلىقتاعى جاعدايدا. جاراقات العاندار نەگىزىنەن سىنىقتاردان زارداپ شەككەن. كاسىپورىن اۋماعىندا ءورت شىقتى، ءبىراق اشىق جانۋ ءسوندىرىلدى.
Wildberries-Russ كومپانياسى ەلەكتروستالداعى قويماعا سوققى جاسالعانىن راستادى، ءبىراق قۇرباندار تۋرالى حابارلامادى. ماسكەۋ وبلىسىنىڭ گۋبەرناتورى اندرەي ۆوروبيەۆ ماركەتپلەيس قىزمەتكەرلەرىنىڭ اراسىندا 24 ادامنىڭ جاراقات العانىن مالىمدەدى. تاڭەرتەڭ تۇسىرىلگەن ۆيدەولاردا قويما عيماراتىن تۇگەل شارپىعان ءىرى ءورت پەن قويۋ سۇر ءتۇتىننىڭ بەلگىلەرى كورىنەدى.
Wildberries كومپانياسىنىڭ نەگىزىن قالاۋشى تاتيانا كيم شابۋىلعا تۇسىنىكتەمە بەردى: «ءبىزدىڭ كومپانيا مەن ەلىمىز ءۇشىن قورقىنىشتى ءتۇن، قورقىنىشتى وقيعا. بۇل اۋىرسىنۋدى سوزبەن جەتكىزۋ مۇمكىن ەمەس. قازا تاپقانداردىڭ بارلىق تۋىستارى مەن جاقىندارىنا كوڭىل ايتامىن». ول قازا تاپقانداردىڭ وتباسىلارىنا كومەك كورسەتىپ، جاراقات العانداردى قولداۋعا ۋادە بەردى، ءبىراق تاۋارلارى جويىلعان نەمەسە زاقىمدالعان ساتۋشىلارعا قولداۋ كورسەتىلەتىنىن ناقتىلامادى.
ماسكەۋ وبلىسىندا دروندار نوگينسكىدەگى مۇناي بازاسىنا دا شابۋىل جاسادى. گۋبەرناتور ۆوروبەۆتىڭ ايتۋىنشا، ناتيجەسىندە ءورت شىعىپ، ەكى ادام جاراقات الدى. جاقىن جەردەگى پەرزەنتحانا ەۆاكۋاسيالانىپ، ناۋقاستار باسقا ەمدەۋ مەكەمەلەرىنە اۋىستىرىلدى. بيلىك دەرەگىنشە، جالپى وبلىسقا 50-گە جۋىق ۋكراين درونى شابۋىل جاسادى.
رەسەي قورعانىس مينيسترلىگى ءتۇن ىشىندە ەل اۋماعى مەن اننەكسيالانعان قىرىم ۇستىندە 379 ۋكراين درونىن اتىپ تۇسىرگەنىن مالىمدەدى. ۋكراينا قارۋلى كۇشتەرىنىڭ اۋە كۇشتەرى 18 شىلدەگە قاراعان ءتۇنى رەسەيلىك اسكەرلەر ۋكرايناعا قارسى 90 درون، ەكى «يسكاندەر-م» بالليستيكالىق زىمىرانى، ەكى «ونيكس» كەمەگە قارسى زىمىرانى جانە ءۇش ح-59/69 اۆياسيالىق زىمىرانىن قولدانعانىن حابارلادى.
ۋكراينا پرەزيدەنتى ۆلاديمير زەلەنسكي ۋكراينا قارۋلى كۇشتەرىنىڭ تامبوۆ جانە ماسكەۋ وبلىستارىنداعى لوگيستيكالىق نىساندارعا جانە مۇناي نىسانىنا سوققى جاساعانىن راستادى. «بۇگىن ءبىزدىڭ الىس قاشىقتىقتاعى سانكسيالارىمىز رەسەي اۋماعىنداعى ءۇش باعىتتا، سونداي-اق ءبىزدىڭ ۋاقىتشا باسىپ الىنعان جەرىمىزدە جانە تەڭىزدە قولدانىلدى. اتاپ ايتقاندا، رەسەيلىكتەردىڭ ءبىزدىڭ ازاماتتىق ينفراقۇرىلىمىمىزعا، قالالارىمىز بەن ەلدى مەكەندەرىمىزگە جاساعان سوققىلارىنا جاۋاپ رەتىندە مايدان شەبىنەن 500 جانە شامامەن 700 شاقىرىم قاشىقتىقتا ورنالاسقان ماسكەۋ جانە تامبوۆ ايماقتارىنداعى ەكى ءىرى لوگيستيكالىق نىسانعا سوققى جاسالدى»، — دەپ جازدى زەلەنسكي. ونىڭ اقپاراتى بويىنشا، بۇل نىساندار «اگرەسسوردىڭ دروندار مەن ناۆيگاسيالىق جابدىقتار وندىرىسىنە ارنالعان سانكسيالانعان كومپونەنتتەردى جەتكىزۋدى قامتاماسىز ەتۋ ءۇشىن پايدالانىلدى».
رەسەي تەرگەۋ كوميتەتى Wildberries قويمالارىنا جاسالعان شابۋىلدارعا بايلانىستى تەرروريزم فاكتىلەرى بويىنشا قىلمىستىق ىستەر قوزعادى، دەپ حابارلادى ۆەدومستۆو وكىلى سۆەتلانا پەترەنكو.