24 شىلدەگە قاراعان ءتۇنى سانكت-پەتەربۋرگ پەن تۆەر وبلىسى ۇشقىشسىز ۇشاقتاردىڭ جاپپاي شابۋىلىنا ۇشىرادى. شابۋىل سالدارىنان Wildberries نىساندارىن قوسا العاندا، قويما كەشەندەرى زاقىمداندى، دەپ حابارلايدى infohub.kz.
لەنينگراد وبلىسىنىڭ اكىمى الەكساندر دروزدەنكو ءوڭىر ۇستىنەن 50 ۇشقىشسىز ۇشاقتىڭ اتىپ تۇسىرىلگەنىن حابارلادى. شابۋىل قاۋپىنە بايلانىستى «پۋلكوۆو» اۋەجايى ۋاقىتشا جۇمىسىن شەكتەدى — اۋە قاقپاسى رەيستەردى قابىلداماي، جىبەرمەي تۇردى.
«وستوروجنو، نوۆوستي» Telegram-ارناسىنىڭ مالىمەتىنشە، شابۋىلعا Wildberries قويمالارىنىڭ ءبىرى ورنالاسقان «ۋتكينا زاۆود» ونەركاسىپ ايماعى ۇشىرادى. كەيىن كومپانيانىڭ ءباسپاسوز قىزمەتى شۋشارى مەن ۋتكينا زاۆودتاعى لوگيستيكالىق كەشەندەر جۇمىسىنىڭ ۋاقىتشا توقتاتىلعانىن مالىمدەدى.
سانكت-پەتەربۋرگ ماڭىنداعى نوۆوساراتوۆكا اۋىلىندا Wildberries قويمالارىنا جاسالعان ۇشقىشسىز ۇشاق شابۋىلىنان ءۇش ادام زارداپ شەكتى. الەكساندر دروزدەنكونىڭ ايتۋىنشا، ولاردىڭ جاعدايى ورتاشا اۋىرلىقتا جانە ولار اۋرۋحانادا مەديسينالىق كومەك الۋدا. قويما اۋماعىندا ءورت شىقتى.
سونىمەن قاتار سيمفەروپولدەگى Wildberries قويماسىنا شابۋىل جاسالعانى بەلگىلى بولدى. كومپانيانىڭ ءباسپاسوز قىزمەتى: «سيمفەروپولدەگى سۇرىپتاۋ ورتالىعى قاۋىپسىزدىك تالاپتارىنا سايكەس ەۆاكۋاسيالاندى»، — دەپ مالىمدەدى.
بۇدان بولەك، ۇشقىشسىز ۇشاقتاردىڭ ءبىرى لەنينگراد وبلىسى كيروۆ اۋدانى سينياۆينو كەنتىندەگى «سەۆەرنايا» قۇس فابريكاسىنىڭ قويماسىنا شابۋىل جاسادى. سونىڭ سالدارىنان عيمارات قۇرىلىمىنىڭ ءبىر بولىگى قۇلادى، الايدا زارداپ شەككەندەر جوق.
سوڭعى اپتالاردا Wildberries نىساندارى رەسەيدىڭ ءارتۇرلى وڭىرلەرىندە بىرنەشە رەت ۇشقىشسىز ۇشاق شابۋىلدارىنىڭ نىساناسىنا اينالدى.