ازىرەت سۇلتان ۇلتتىق تاريحي-مادەني مۋزەي-قورىعىنىڭ ياساۋيتانۋ عىلىمي ورتالىعىنىڭ ماماندارى ماسكەۋگە عىلىمي ەكسپەديسيا بارىسىندا ياساۋي تاريقاتىنىڭ تاريحى مەن رۋحاني ىلىمىنە ارنالعان، بۇرىن از بەلگىلى XVII عاسىرداعى قولجازبانى تاپتى، دەپ حابارلايدى infohub.kz.
تابىلعان قولجازبا «حۋدججات از-زاكيرين لي-رادد ال-مۋنكيرين» دەپ اتالادى، بۇل اۋدارمادا «زىكىر ەتۋشىلەردىڭ ونى تەرىسكە شىعارۋشىلارعا قارسى دالەلى» دەگەندى بىلدىرەدى. تۋىندى بۇحارادا جاسالعان جانە ياساۋي مەكتەبىنىڭ تاريحى بويىنشا ماڭىزدى جازبا دەرەككوز سانالادى.
قولجازبادا سوپىلىق تاربيە پرينسيپتەرى، جاريا زىكىر ءداستۇرى جانە رۋحاني ساباقتاستىق قاراستىرىلادى. قۇجاتتا قوجا احمەت ياساۋي، حاكيم اتا، زاڭگى اتا جانە تاريقاتتىڭ كەيىنگى وكىلدەرىنە تارايتىن رۋحاني تىزبەك تۋرالى مالىمەتتەر بار.
قازىرگى ۋاقىتتا ماماندار قولجازبانىڭ عىلىمي سيپاتتاماسىن دايىنداپ جاتىر. ودان كەيىن ءماتىن تۋىندىنىڭ بۇرىن بەلگىلى تىزىمدەرىمەن سالىستىرىلىپ، تەكستولوگيالىق تالداۋ جۇرگىزىلەدى، ال زەرتتەۋ ناتيجەلەرى عىلىمي اينالىمعا ەنگىزىلەدى.