اقش-تاعى يەللوۋستون ۇلتتىق ساياباعىنىڭ قىزمەتكەرلەرى بيىل گيدروتەرمالدى ايماقتاردان 20 100 بولىك قوقىس جيناپ، رەكورد ورناتتى، دەپ حابارلايدى infohub.kz سايتى.
ءجيى كەزدەسەتىن زاتتار: 280 باس كيىم، 54 كامەرا وبەكتيۆىنىڭ قاقپاعى، 47 شاش قىستىرعىش، 42 قارىنداش، 36 كۇن كوزىلدىرىگى، 20 ءقوناقۇي كىلت كارتاسى جانە 17 بالالار ەمىزىگى.
«ماسەلەنى ساياباقتاعى قاتتى جەل ودان ءارى ۋشىقتىرادى: كەنەت سوققان ەكپىن قاعاز مايلىقتى، كارتانى، تاعام قاپتاماسىن، ءتىپتى كۇن كوزىلدىرىگى مەن باس كيىم سياقتى اۋىر زاتتاردى دا وڭاي ۇشىرىپ اكەتەدى!» — دەدى يەللوۋستون ۇلتتىق ساياباعىنىڭ گەولوگيا باعدارلاماسىنداعى فيزيكالىق عىلىمدار تەحنيگى ماردجەري پرايس اقش گەولوگيالىق قىزمەتىنىڭ بلوگىنا جازعان ماقالاسىندا.
وعان قوسا، ساياباققا كەلۋشىلەر ىستىق بۇلاقتاردى تىلەك قۇدىعى رەتىندە پايدالانادى. يەللوۋستون گەولوگيا توبى 2026 جىلدىڭ جازىندا دوللار مەن پەسو، يەن مەن ەۋرودان باستاپ ءارتۇرلى ۆاليۋتاداعى 18 دوللاردان استام تيىن جينادى.
جىلىنا 4،5 ميلليوننان استام ادام كەلەتىن يەللوۋستون — امەريكا قۇراما شتاتتارىنداعى ەڭ كوپ باراتىن ۇلتتىق ساياباقتاردىڭ ءبىرى.
«قوقىستىڭ ءتۇرى قانداي بولسا دا، ونى الىپ تاستاۋ كەرەك. كەز كەلگەن بوگدە زات گيدروتەرمالدى نىساندى زاقىمداۋى نەمەسە ءبىرجولا وزگەرتۋى مۇمكىن: سۋ كوزىن بىتەۋى، اعىن ارناسىن بوگەۋى نە بۇرۋى، حيميالىق زاتتارمەن جانە شوگىندىلەرمەن لاستاۋى ىقتيمال»، — دەدى پرايس.
1900 جىلدارى ساياباقتاعى مورنينگ گلوري بۇلاعى كەلۋشىلەر تاستاعان قوقىستىڭ كەسىرىنەن ءتۇسىن وزگەرتكەنىمەن تانىمال بولدى. 1950 جىلدارى ونى «قوقىس جاشىگى» دەپ اتاپ كەتكەن.
بيىل ساياباقتىڭ گەولوگيا قىزمەتكەرلەرى التى Invisalign ءتىس تۇزەتكىشىن، سەگىز كىشكەنتاي جارىس كولىگىن، ءۇش گولف ءتيىسىن جانە ون بەس جالعان تىرناق تاپتى.
ساياباق قىزمەتكەرلەرى قوقىستىڭ كوبى ابايسىزدا ۇشىپ كەتەتىنىن تۇسىنگەنىمەن، كەلۋشىلەردى يەللوۋستونعا بارعاندا «قوقىسىڭدى جينا» دەگەن ۇستانىمدى ۇستانۋعا شاقىرادى. ياعني جەلدى ايماقتاردا قاپتامالاردى، مايلىقتاردى، ءتىپتى باس كيىمدەردى دە مۇقيات ساقتاۋ كەرەك. ماۋسىم سوڭىندا قالدىرىلعان بارلىق باس كيىمدى جۋىپ، قايىرىمدىلىققا بەرۋگە ۋادە ەتتى.