يەمەن جاعالاۋىندا ءۇندى تۋى بار كەمە راكەتامەن باتىرىلدى. بۇل شابۋىلدى يران قولدايتىن حۋسيتتەر جاساعانىن حالىقارالىق مويىندالعان ۇكىمەتتىڭ كولىك مينيسترلىگى مالىمدەدى. ولاردىڭ ايتۋىنشا، شابۋىل جارىلعىش زات تيەلگەن قايىق ارقىلى جاسالعان، دەپ حابارلايدى Reuters اگەنتتىگى. حۋسيتتەر بۇل وقيعاعا ازىرگە تۇسىنىكتەمە بەرگەن جوق.
حۋسيتتەر 20 شىلدەدە ساۋد ارابياسىنىڭ قىزىل تەڭىزدەگى پورتتارىنا بلوكادا جاريالاعان بولاتىن. بريتاندىق تەڭىز ساۋدا وپەراسيالارى اگەنتتىگى سوڭعى اپتادا ايماقتاعى كەمەلەرگە بىرنەشە شابۋىل جاسالعانىن حابارلادى. وسىعان قاراماستان، مۇناي باعاسى سەيسەنبىدە ءۇش اپتالىق مينيمۋمعا ءتۇستى، ويتكەنى اقش-تىڭ جوعارى لاۋازىمدى شەنەۋنىكتەرى يرانمەن ورمۋز بۇعازىن قايتا اشۋ تۋرالى كەلىسىمگە ءۇمىت ارتتى.
ماۋسىم ايىندا اقش پەن يران اسكەري وپەراسيالاردى توقتاتۋ جانە بۇعازدى قايتا اشۋ، سونداي-اق 60 كۇن ىشىندە سوعىستى اياقتاۋ تۋرالى كەلىسىمگە قول جەتكىزگەن بولاتىن. الايدا، كەلىسىمگە قول قويىلعاننان ءۇش اپتا وتكەن سوڭ، اقش پرەزيدەنتى دونالد ترامپ يراننىڭ بۇعازداعى كەمەلەرگە جاساعان شابۋىلدارىنان كەيىن اتىستى توقتاتۋ رەجيمىن اياقتالدى دەپ جاريالادى. اقش تاراپى بۇعان جاۋاپ رەتىندە سوققى جاسادى.
اقش شەنەۋنىكتەرى سەيسەنبىدە كەلىسسوزدەردىڭ ءجۇرىپ جاتقانىن، قازىناشىلىق حاتشىسى سكوتت بەسسەنتتىڭ ايتۋىنشا، بۇعازدى قايتا اشۋ تۋرالى كەلىسىمگە سەيسەنبى نەمەسە سارسەنبىدە قول جەتكىزۋى مۇمكىن ەكەنىن جەتكىزدى. يران بولسا، اقش-پەن كەلىسسوز جۇرگىزىپ جاتقان جوقپىز جانە جۇرگىزۋدى جوسپارلاپ وتىرعان جوقپىز، ومانمەن سويلەسىپ جاتىرمىز دەپ مالىمدەدى.