(ساحنادا اجەسى كەستە تىگىپ وتىرادى. دالادان جۇگىرىپ كەلگەن نەمەرەسى، موينىنان قۇشاقتاپ، ەركەلەيدى)
نەمەرەسى:
— اجە، اق اجەم، اجەتايىم!
اجەسى:
— كەلگەن كىم ەكەن؟ وسى ۇيدە ءتاتتى قوشاقان بار ەدى، سول قىز با ەكەن اجەسىنە ەركەلەپ جاتقان؟
نەمەرەسى:
— اجە، نە ىستەپ وتىرسىز؟
اجەسى:
— قوشاقاننىڭ جاساۋىن جاساپ وتىرمىن.
نەمەرەسى:
— «جاساۋ» دەگەن نە، اجە؟
اجەسى:
— «جاساۋ» دەگەن — ۇزاتىلعان قىزدىڭ سوڭىنان اپاراتىن قولدان جاسالعان كورپە-جاستىق، جيھاز-ساندىق، ىدىس-اياعى بوتام.
نەمەرەسى:
— سوندا مەنى ۇزاتايىن دەپ جاتىرسىزدار ما؟ مەن ءالى كىشكەنتايمىن عوي؟
اجەسى (ك ۇلىپ):
— جوق، بالاپانىم! سەن وسەم دەگەنشە قايدا... ؟! تەك ول كۇنگە دەيىن اجەڭ بار بولا ما، جوق بولا ما، كىم بىلەدى؟ (كۇرسىنىپ) كوزىم كورىپ تۇرعاندا ءبىر تۇسكيىزىڭدى كەستەلەپ قويايىن دەگەنىم عوي، شىراعىم!
نەمەرەسى:
— اجە، مەن وسكەندە سىزگە ۇشاقپەن الەمدى ارالاتام. ارمانداپ جۇرگەن مەككەڭىزگە اي سايىن اپارام! كەمەگە وتىرعىزىپ، كاتامارانمەن قىدىرتام.
اجەسى:
— ءاۋمين، ق ۇلىنىم! ارمانىڭا جەت! سەنىڭ قىزىعىڭدى كورسەم ارمان بار ما؟ (جاۋلىعىنىڭ ۇشىمەن كوزىن سۇرتەدى)
نەمەرەسى:
— اجە، مەن دە تىگىپ كورەيىنشى..؟
اجەسى:
— ىنتا-نيەتىڭنەن اينالدىم! قانە، تىكسەڭ تىگىپ كورە عوي؟ العاشقى تىگىستى قىسقا الاسىڭ كەيىنگىلەرىن ءسال جوعارى الىپ، ءدال ورتاسىن بيىك قىلاسىڭ. كەيىن قايتا ازايتاسىڭ. سوندا وسىنداي تولقىن شىعادى.
نەمەرەسى:
— اجە، مىنا گۇلدەردى قالاي جاسادىڭىز؟
اجەسى:
— ينەنىڭ باسىنا قىزىل ءجىپتى شيىرشىقتاي وراپ، ءدال ورتاسىنان تىكسەڭ، وسىلاي گۇل بولىپ شىعادى.
نەمەرەسى:
— اجە، سىزگە نەگە ينستاگرامنان پاراقشا اشىپ، «شەبەرلىك ساعاتىن» وتكىزبەسكە؟ ءوزىم جۇرگىزەم!
اجەسى:
— ول نە تاعى قاراعىم؟
نەمەرەسى:
— اجە، ءسىز ماعان كەستەلەپ تۇسكيىز تىگۋدىڭ نەشە ءتۇرىن كورسەتەسىز. ال مەن ونى بەينەتاسپاعا ءتۇسىرىپ، ينستاگرامعا جۇكتەيمىن. ونى ەلدىڭ ءبارى كورەدى. اسىرەسە مەن سەكىلدى وقۋشىلار. سولاي ەلگە تانىمال «شەبەر اجە» اتاناسىز.
اجەسى:
— ەەە، ق ۇلىنىم! «ۇيرەنەم» دەگەن جاستار بولسا، قۋانا-قۋانا كورسەتەم عوي.
نەمەرەسى (قولىنا تەلەفونىن الىپ):
— سالەم ينستادوستار! بۇدان بىلاي مەن سىزدەرگە «الەمدەگى ەڭ مەيىرىمدى» اجەنىڭ «تۇسكيىز تىگۋ» اتتى شەبەرلىك ساعاتىن ۇسىنامىن! مەنىڭ پاراقشامنان الىستاماڭىزدار!
اجەسى:
— اقبوتام-اۋ، مەنى الەيىم ەل كورسە، دايىندالىپ، ادەمى كويلەگىمدى كيىپ كەلەيىن. «كىرىسپە ساباق» دايىندايىن. ءقازىر اسىقپايىق؟!
نەمەرەسى:
— اجە، ءسىز ونسىز دا ادەمى، سۇلۋ بولىپ وتىرسىز! ءبىراق «كىرىسپە ساباق» دەگەنىڭىز دۇرىس ەكەن...
اجەسى:
— وندا مەن كەستە تىگىپ وتىرعاندا ايتاتىن، قىزىقتى ەرتەگىلەرىمدى دە دايىنداسام قايتەدى؟
نەمەرەسى:
— اجە ەرتەگىلەرگە «اجەمنىڭ ەرتەگىلەرى» دەگەن بولەك پاراقشا ارنايىن؟ ال تىگىننىڭ قىسقا-نۇسقا بولعانى دۇرىس! سوسىن شەجىرە مەن ەل تاريحىنا قاتىستى اڭگىمەلەرىڭىزدى دە تاسپاعا ءتۇسىرىپ قويايىقشى؟!
اجەسى:
— ق ۇلىنىم-اۋ؟! «بوياۋشى-بوياۋشى دەگەنگە، ساقالىن بوياپتى» - دەگەندەي، ەلدەن ۇيات بولماسىن؟! ول قاجەت بولا قويار ما ەكەن؟!
نەمەرەسى:
— اجە، سىنىپتا ءبىر وقۋشى ماعان:
— اجەڭ نە ءۇشىن قىتايعا كەتىپ قالعان باياعىدا؟ - دەپ سۇرادى. سوسىن مەن وعان اننەنكوۆتىڭ قازاق اۋىلدارىنا جاساعان ز ۇلىمدىقتارى تۋرالى، ءسىز ايتقان اڭگىمەلەردى ايتىپ بەردىم. ونىڭ جىلاعىسى كەلىپ كەتتى سول كەزدە...
اجەسى:
— ەگەر قاجەت بولىپ جاتسا، ايتايىن ق ۇلىنىم. ەەە، بۇل قازاق نە كورمەدى شىراعىم؟! قوي، كەشكى استى قامدايىق بوتام؟ اناڭ شارشاپ كەلگەندە، اسى دايىن تۇرسىن.
(اجەسى ورنىنان تۇرىپ، ەتەگىن قاعىپ، ساحنادان كەتەدى. نەمەرەسى ينستاگرامعا جازبا جازادى.)
نەمەرەسى:
— دوستار، مەنىڭ اجەم وتە قىزىق اڭگىمەلەر بىلەدى. ەگەر سول اڭگىمەلەردى ەستىگىلەرىڭ كەلسە، ءلۇپىل باسىڭىزدار! وكىنبەيسىزدەر! (تەلەفونىن ءوشىرىپ):
— اجە، قانداي كوكونىس ارشيىن؟ اجە..! ( شىعىپ كەتەدى.)
(سوڭىنان ساحناعا قايتا كەلىپ، ەكەۋى ءسال باستارىن يزەپ، قوشەمەت كورسەتىپ كەتەدى.)