قازاقستاندا ءبىر اي ىشىندە 500-دەن استام جۇك كولىگى تەكسەرىلىپ، ىستىق اۋا رايىنا بايلانىستى 302 كولىكتىڭ قوزعالىسى شەكتەلدى. بۇل – ءبىر ايلىق ءىس-شارانىڭ ناتيجەسى، دەپ حابارلايدى inbusiness.kz ق ر كولىك مينيسترلىگىنە سىلتەمە جاساپ.
قازاقستاندا 10 شىلدە مەن 10 تامىز ارالىعىندا «نازار اۋدارىڭىز! اۋىر سالماقتى كولىك!» پروفيلاكتيكالىق اكسياسى وتۋدە. ونىڭ ماقساتى – ءىرى گاباريتتى جانە اۋىر سالماقتى جۇكتەردى تاسىمالداۋدى باقىلاۋدى كۇشەيتۋ، سونداي-اق اۆتوموبيل جولدارىن ساقتاۋ. سونىمەن قاتار، ەلىمىزدە جول توسەمىنىڭ بۇزىلۋىنا جول بەرمەۋ ءۇشىن اۋا تەمپەراتۋراسى جوعارى ۋاقىتتا جۇك كولىكتەرىنىڭ قوزعالىسىن ۋاقىتشا شەكتەيتىن ماۋسىمدىق تەمپەراتۋرالىق رەجيم قولدانىلادى.
شەكتەۋلەر اۋا تەمپەراتۋراسى +25 °C-تان جوعارى بولعاندا ەنگىزىلەدى جانە جۇك كولىكتەرىنىڭ جەكەلەگەن ساناتتارىنا قولدانىلادى. الايدا بۇل حالىقارالىق جانە جولاۋشىلار تاسىمالىنا، سونداي-اق تەز ب ۇلىنەتىن، ءقاۋىپتى جانە گۋمانيتارلىق جۇكتەردى تاسىمالداۋعا قاتىستى ەمەس. توتەنشە جاعدايلاردى جويۋعا، جول جۇمىستارىنا جانە اسكەري تاسىمالعا جۇمىلدىرىلعان كولىكتەر دە ەرەكشەلىككە يە. سالماق-گاباريتتىك نورمالار مەن تەمپەراتۋرالىق رەجيم تالاپتارىنىڭ ساقتالۋىن اۋماقتىق كولىك باقىلاۋ ورگاندارى قاداعالايدى.
اكسيا اياسىندا ماماندار 500-دەن استام اۋىر سالماقتى كولىك قۇرالىن تەكسەردى. تەكسەرۋ ناتيجەسىندە كولىك زاڭناماسىنىڭ 281 بۇزۋشىلىعى انىقتالدى، ونىڭ ىشىندە كولىك قۇرالدارىنىڭ رۇقسات ەتىلگەن ماسساسىنان اسىپ كەتۋدىڭ 116 فاكتىسى بار. سونىمەن قاتار، ماۋسىمدىق تەمپەراتۋرالىق رەجيم تالاپتارىن ساقتاماعانى ءۇشىن 302 جۇك كولىگىنىڭ قوزعالىسى شەكتەلدى. بارلىق انىقتالعان بۇزۋشىلىقتار بويىنشا تاسىمالداۋشىلار اكىمشىلىك جاۋاپكەرشىلىككە تارتىلدى.
قازاقستان رەسپۋبليكاسى كولىك مينيسترلىگى تاسىمالداۋشىلاردى قولدانىستاعى ماۋسىمدىق شەكتەۋلەردى ەسكەرە وتىرىپ، باعىتتار مەن قوزعالىس كەستەلەرىن الدىن الا جوسپارلاۋعا شاقىردى. بۇل بۇزۋشىلىقتاردى بولدىرماۋعا جانە اۆتوموبيل جولدارىنىڭ ساقتالۋىن قامتاماسىز ەتەدى.
تولىعىراق infohub.kz سايتىنان.