2026 جىلى قازاقستاندىقتاردىڭ جۇڭگو ۆاليۋتاسىنا دەگەن قىزىعۋشىلىعى ايتارلىقتاي السىرەدى: قاڭتار–شىلدە ارالىعىندا ايىرباستاۋ پۋنكتتەرى «تازا» 303 ملن تەڭگەگە عانا يۋان ساتتى. بۇل بىلتىرعىمەن سالىستىرعاندا 45،9%-عا از، دەپ حابارلايدى infohub.kz سايتى.
قازاقستان رەسپۋبليكاسى ۇلتتىق بانكىنىڭ دەرەگىنشە، 2026 جىلدىڭ شىلدەسىندە دوللاردىڭ نەتتو-ساتىلىمى (ايىرباستاۋ پۋنكتتەرىنىڭ ساتۋى مەن ساتىپ الۋىنىڭ ايىرماسى) شامامەن 123،03 ملرد تەڭگەنى قۇرادى — بىلتىرعى دەڭگەيمەن شامالاس. يۋاندە ديناميكا كەرىسىنشە: شىلدەدە حالىق «تازا» 12،2 ملن تەڭگەگە عانا جۇڭگو ۆاليۋتاسىن ساتىپ الدى، ياعني ايىرباستاۋ پۋنكتتەرىنە يۋان تاپسىرعانىن ەسكەرگەندە. بىلتىر وسى ايدا نەتتو-ساتىلىم 156،6 ملن تەڭگەگە جەتكەن.
Finprom پورتالى اتاپ وتكەندەي، مۇنشالىقتى كۇرت قۇلدىراۋعا ەلەۋلى سەبەپ بولماعان. قاڭتاردا ورتاشا باعامى 507،6 تەڭگەگە جەتىپ، شىلدەدە 472،13 تەڭگەگە تومەندەگەن دوللاردان وزگەشە، يۋاندە مۇنداي «سەكىرىستەر» بايقالماعان.
«بىلتىرعى قاڭتار-شىلدەدە رەسمي باعامنىڭ ورتاشا ءمانى ءبىر يۋان ءۇشىن شامامەن 71 تەڭگە بولسا، 2026 جىلدىڭ وسى كەزەڭىندە — شامامەن 70،7 تەڭگە، ياعني ايىرما 1%-عا دا جەتپەدى»، – دەيدى ساراپشىلار.
جالپى 2026 جىلدىڭ قاڭتار–شىلدەسىندە ايىرباستاۋ پۋنكتتەرى ساتىپ العانىنان 303 ملن تەڭگەگە ارتىق يۋان ساتتى. بۇل بىلتىرعىدان 45،9%-عا از. سالىستىرار بولساق: 2025 جىلدىڭ 7 ايىندا جۇڭگو ۆاليۋتاسىنىڭ نەتتو-ساتىلىمى 559،7 ملن تەڭگە، ال 2024 جىلدىڭ وسى كەزەڭىندە 727،6 ملن تەڭگە بولعان. وسىلايشا، ەكى جىلدا يۋانگە سۇرانىس 2،4 ەسە ازايدى.
ايماقتىق قۇرىلىم دا وزگەردى: الماتىدا نەتتو-ساتىلىم كولەمى 6،2 ەسە قىسقارىپ، 58،4 ملن تەڭگەگە ءتۇستى، ال كوش باسىنا 104،4 ملن تەڭگە كورسەتكىشىمەن قاراعاندى وبلىسى شىقتى.
قولما-قول يۋانمەن جاسالاتىن وپەراسيالاردىڭ ازايۋى قازاقستاننىڭ قىتايمەن ساۋداسىنىڭ ايتارلىقتاي كولەمىنە قاراماستان ءجۇرىپ جاتقانى نازار اۋدارتادى. 2026 جىلدىڭ قاڭتار–شىلدەسىندە قازاقستاندىق تاۋارلاردىڭ قىتايعا ەكسپورتى 9،2 ملرد دوللاردى، جۇڭگو تاۋارلارىنىڭ يمپورتى 10،9 ملرد دوللاردى قۇراپ، جالپى تاۋار اينالىمى 20 ملرد دوللارعا جەتتى.
جۇڭگو 18% ۇلەسپەن قازاقستاندىق ەكسپورتتىڭ ەڭ ءىرى باعىتىنا اينالىپ، 29،4% ۇلەسپەن يمپورتتىڭ ەكىنشى ءىرى جەتكىزۋشىسى بولدى. الايدا سىرتقى ساۋدا كولەمى حالىقتىڭ قولما-قول يۋانگە سۇرانىسىن تولىق كورسەتە المايدى، وعان دەگەن قىزىعۋشىلىق شەكتەۋلى كۇيىندە قالىپ وتىر.