2026 جىلعى ازيا ويىندارىندا قازاقستاننىڭ جەكەلەي سىنداعى ەكىنشى راكەتكاسى يۋليا پۋتينسەۆا كەزەكتى ماچىندا جەڭىسكە جەتتى، دەپ حابارلايدى infohub.kz سايتى.
ەكىنشى اينالىمداعى كەزدەسۋدە قازاقستاندىق تەننيسشى جۇڭگو تايبەيىنىڭ وكىلى يا-يي يانگپەن شەبەرلىك بايقاستى. ماچ پۋتينسەۆانىڭ ەكى سەتتەگى جەڭىسىمەن اياقتالدى — 6:3، 6:1.
ءبىرىنشى پارتيانى قازاقستاندىق 6:3 ەسەبىمەن ءوز پايداسىنا شەشتى. ەكىنشى سەتتە قازاقستان وكىلىنىڭ باسىمدىعى بۇرىنعىدان دا ايقىن بولدى: قارسىلاسىنا ءبىر عانا گەيم ۇتۋعا مۇمكىندىك بەرىپ، كەزدەسۋدى جەڭىسپەن ءتامامدادى.
تەننيسشىلەر كورتتا 1 ساعات 28 مينۋت وتكىزدى. وسىلايشا، پۋتينسەۆا ازيا ويىندارىنىڭ جەكەلەي سىنىندا مەدال ءۇشىن كۇرەسىن جالعاستىرۋدا. كەلەسى قارسىلاسىنىڭ ەسىمى كەيىنىرەك بەلگىلى بولادى.
ايتا كەتەيىك، پۋتينسەۆا — قازاقستاننىڭ جەتەكشى تەننيسشىلەرىنىڭ ءبىرى. جەكەلەي جارىستاردا ونەر كورسەتۋمەن قاتار، سپورتشى اننا دانيلينامەن جۇپتىق سىندا دا ب ا ق سىنايدى.
XX جازعى ازيا ويىندارى ايچي پرەفەكتۋراسى مەن ناگويا قالاسىندا ءوتىپ جاتىر. جارىستار 4 قازاندا مارەسىنە جەتەدى.