قازاقستاندىق تەننيسشى يۋليا پۋتينسەۆا (الەمدەگى 82-ورىن) ارمەنيا اتىنان ونەر كورسەتەتىن الينا چاراەۆانى (118-ورىن) 6:3، 6:3 ەسەبىمەن سەنىمدى جەڭىپ، رۋمىنيانىڭ ياسسى قالاسىندا ءوتىپ جاتقان WTA-250 Unicredit Iasi Open ءتۋرنيرىنىڭ شيرەك فينالىنا شىقتى، دەپ حابارلايدى infohub.kz سايتى.
ءبىرىنشى اينالىمدا پۋتينسەۆا امەريكاندىق كلەر ءليۋدى (111) 7:5، 6:4 ەسەبىمەن ۇتتى. چاراەۆا ءۇشىن بۇل تۋرنير WTA-250 دەڭگەيىندەگى العاشقى جەڭىس بولدى. ول باستاپقى ماچتا اندوررا وكىلى ۆيكتوريا حيمەنەس-كاسينسەۆانى (114) 6:0، 6:1 ەسەبىمەن تاس-تالقان ەتتى. رەسەيدىڭ سامارا قالاسىندا تۋىپ، يسپانيادا جاتتىعاتىن 24 جاستاعى تەننيسشى كاسىبي جولىن جاڭا باستاعان.
بۇرىن الەم رەيتينگىنىڭ ۇزدىك 20-لىعىنا كىرگەن پۋتينسەۆانىڭ تاجىريبەسى مەن شەبەرلىگى ءبىرىنشى پارتيادا بايقالدى. ول العاشقى گەيمدە قارسىلاسىنىڭ پوداچاسىن الىپ، توعىزىنشى گەيمدە ەكىنشى برەيك جاسادى — 6:3.
ەكىنشى سەتتە بويى ۇزىن (183 سم، پۋتينسەۆادا 163 سم) جانە Australian Open-تىڭ ەكى دۇركىن چەمپيونى سۆەتلانا كۋزنەسوۆانىڭ جەتەكشىلىگىمەن جاتتىعاتىن چاراەۆا بەلسەندى وينادى. ول بىردەن برەيك جاساپ، باسىمدىلىعىن ارتتىردى — 2:0. الايدا قازاقستاندىق ءتورتىنشى برەيك-پوينتتان كەيىن ەسەپتى تەڭەستىرىپ، العا شىقتى (4:3) جانە تاعى ءبىر برەيك جاسادى. پۋتينسەۆا ەكىنشى ماچبولدا كەزدەسۋدى 1 ساعات 33 مينۋتتا اياقتادى — 6:3، 6:3. ماچ بارىسىندا پۋتينسەۆا ءۇش ەيس بەردى (قارسىلاسىندا ءبىر)، ۇتىس وچكولارى 68-52 ءوز پايداسىنا بولدى.
شيرەك فينالدا پۋتينسەۆا مىسىرلىق مايار شەريف (97) پەن يسپاندىق كەيتلين كەۆەدونىڭ (100) اراسىنداعى ماچ جەڭىمپازىمەن كەزدەسەدى.
الينا چاراەۆا سول كۇنى تاعى ءبىر ماچ وتكىزەدى — جۇپتىق سىندا قازاقستاندىق جيبەك كۋلامباەۆامەن (174) بىرگە رەسەيلىك ماريا كوزىرەۆا (59) مەن ەلەنا پريدانكيناعا (76) قارسى وينايدى.
جەكەلەي ءتۋرنيردىڭ ىرىكتەۋىندە كۋلامباەۆا يسپاندىق لەيرا رومەرو گورمەستەن (143) 1:6، 4:6 ەسەبىمەن جەڭىلدى.
Unicredit Iasi Open ءتۋرنيرى توپىراق كورتىندا 2022 جىلى پايدا بولدى. 2025 جىلى ول WTA كۇنتىزبەسىندەگى ۆەنگريا گران-پريىنىڭ ورنىن يەلەنىپ، «250» ساناتىن الدى. جەكەلەي سىندا ءۇش رەت رۋمىندىقتار جەڭىسكە جەتتى، ءبىراق 2024 جىلى رەسەيلىك ءجاسوسپىرىم ميررا اندرەەۆا چەمپيون اتاندى. 2024 جىلى جۇپتىق سىندا قازاقستاندىق اننا دانيلينا مەن رەسەيلىك يرينا حروماچەۆا جەڭىمپاز بولدى.
2026 جىلعى ءتۋرنيردىڭ جۇلدە قورى 283 350 دوللاردى قۇرايدى. ءبىرىنشى ءنومىرلى رۋمىندىق جاكلين كريستيان (37) سوڭعى ساتتە جارىستان باس تارتتى، ءسويتىپ ونىڭ ورنىن پۋتينسەۆا الدى.