رەسەيلىك تانىمال جۋرناليست يۋري دۋد قازاقستاندىق اۋديتورياعا قايتا جۇگىنىپ، كەلەسى ساپارىندا قانداي ۇلتتىق تاعامداردى تاتىپ كورۋ كەرەكتىگىن سۇرادى، دەپ حابارلايدى infohub.kz.
دۋد ءوزىنىڭ Instagram-پاراقشاسىندا 2021 جىلى ماڭعىستاۋ وبلىسىنا ساپارى كەزىندە بلوگەر رۋسلان ۋساچەۆپەن جازعان سۇحباتىنىڭ ءۇزىندىسىن جاريالادى. بەينەجازبادا جۋرناليست پەن بلوگەر اقتاۋ ماڭىندا شۇباتتى تاتىپ كورىپ، بوزجىرا شاتقالىنا بارادى. جاريالانىم استىندا دۋد قازاق اسحاناسى تۋرالى سۇراق قويدى.
«قازاقستاننان تىس جەردەگى دوستار، سەندەر تاتىپ كوردىڭدەر مە؟ اسەرلەرىڭمەن بولىسىڭدەر! قازاقستانداعى دوستار، مۇمكىندىك بولعاندا تاعى قانداي جەرگىلىكتى تاعامداردى تاتىپ كورۋگە كەڭەس بەرەسىزدەر؟» — دەپ جازدى ول.
سول ساپاردا دۋد مەن ۋساچيەۆ شۇباتتى دۇكەننەن ەمەس، جەرگىلىكتى تۇرعىنداردان العان. جۋرناليست ولارعا جاڭا سۋسىندى سەنىمدى ادامداردان الۋعا كەڭەس بەرىلگەنىن ايتتى. «قازاقستان تۋرالى ايتقاندا، ەڭ الدىمەن قىمىز ەسكە تۇسەدى. ءبىراق تاعى ءبىر ءسۇت بار. بۇل — شۇبات، تۇيە ءسۇتى»، — دەدى دۋد بەينەجازبادا.
ول سونداي-اق سۋسىن تۋرالى اسەرىمەن ءبولىستى: «كەشەگى ساۋىلعان شۇبات، ايتۋلارىنشا، بارلىق اۋرۋعا شيپا. دەنساۋلىقتارىڭىزعا»، — دەپ اتاپ ءوتتى جۋرناليست. دەگۋستاسيادان كەيىن رۋسلان ۋساچيەۆ شۇباتتىڭ ءدامىن ايرانعا ۇقساتتى، ال دۋد بۇعان قوسىلىپ، سۋسىنعا وڭ باعا بەردى.
جاڭا جاريالانىم وقىرماندارعا ءجۋرناليستىڭ وتكەن ساپارىن ەسكە سالدى. قازاقستاندىق پايدالانۋشىلار وعان كەلەسى ساپارعا ارنالعان جەرگىلىكتى تاعامداردى بەلسەندى تۇردە ۇسىنۋدا. دۋد قازاقستانعا قايتا كەلە مە، ازىرگە بەلگىسىز. بۇعان دەيىن الەكساندر نەزلوبينگە بەرگەن سۇحباتىندا جۋرناليست ەلگە كەلۋدەن قاۋىپتەنەتىنىن مويىنداعان، سەبەبى رەسەيدە وعان قاتىستى قىلمىستىق ءىس قوزعالعان، ال 2022 جىلى رەسەي ادىلەت مينيسترلىگى ءدۋدتى شەتەلدىك اگەنتتەر تىزىلىمىنە ەنگىزگەن.