بۇعان دەيىن رەسەيدە شەتەلدىك اگەنت دەپ تانىلعان تانىمال جۋرناليست يۋري دۋد تەرروريستىك جانە ەكسترەميستىك ارەكەتكە قاتىسى بار ادامدار تىزىمىنە قوسىلدى. ءتيىستى جازبانى قارجى مونيتورينگى جونىندەگى فەدەرالدىق قىزمەت (روسفينمونيتورينگ) ەنگىزىپ، 7039 نومىرىمەن جاريالادى، دەپ حابارلايدى infohub.kz سايتى.
تىزىمدە ءجۋرناليستىڭ دەربەس دەرەكتەرى كورسەتىلگەن: «دۋد يۋري الەكساندروۆيچ، 1986 جىلعى 11 قازاندا تۋعان، پوتسدام قالاسى، گدر».
باسىلىمنىڭ تۇسىندىرۋىنشە، مۇنداي تىزىمگە ەنۋ بانك شوتتارىنىڭ بۇعاتتالۋىنا اكەپ سوعادى. ادامعا تەك شەكتەۋلى سومانى الۋعا جانە جۇمساۋعا رۇقسات ەتىلەدى — ول دا «ءوزىنىڭ تىرشىلىگىن، سونداي-اق وزىمەن بىرگە تۇراتىن، دەربەس تابىس كوزى جوق وتباسى مۇشەلەرىنىڭ تىرشىلىگىن قامتاماسىز ەتۋ ءۇشىن» عانا.
يۋري دۋد — جۋرناليست جانە بلوگەر، ونىڭ YouTube ۆيدەوحوستينگىندەگى ارناسىنىڭ 10 ميلليوننان استام جازىلۋشىسى بار. 2022 جىلدىڭ ساۋىرىندە رەسەيدىڭ ادىلەت مينيسترلىگى ونى شەتەلدىك اگەنت دەپ جاريالادى. جۋرناليست بۇل شەشىمگە شاعىمدانىپ، «شەتەلدىك اگەنت فۋنكسياسىن اتقاراتىن شەتەلدىك ب ا ق تىزىلىمىنە ەنگىزىلگەنى تۋرالى حابارلاما جىبەرمەۋىنەن كورىنگەن ادىلەت مينيسترلىگىنىڭ ارەكەتسىزدىگىن زاڭسىز دەپ تانۋدى» تالاپ ەتتى. الايدا جوعارعى سوت ونىڭ تالابىن قاناعاتتاندىرۋدان باس تارتتى.