دونالد ترامپ اكىمشىلىگى شەتەلدىك جۋرناليستەرگە ۆيزا بەرۋ ەرەجەلەرىن قاتايتىپ، ولاردىڭ الەۋمەتتىك جەلىدەگى اككاۋنتتارىن تەكسەرۋدى ەنگىزۋدى جوسپارلاپ وتىر، دەپ حابارلايدى infohub.kz سايتى.
Bild باسىلىمى The Daily Signal-گە سىلتەمە جاساپ حابارلاعانداي، ۆيزاعا ءوتىنىش بەرۋشىلەردىڭ كەيبىر ساناتتارى، ونىڭ ىشىندە شەتەلدىك جۋرناليستەر، Instagram، Facebook جانە X-تەگى پروفيلدەرىن جۇرتشىلىققا اشىق ەتۋگە مىندەتتەلەدى. ول ءۇشىن جابىق اككاۋنتتاردى اشىققا اۋىستىرۋ قاجەت بولادى.
بۇل جوسپارلاردىڭ رەسمي راستاۋى ازىرگە جوق. دەگەنمەن، اق ءۇيدىڭ ءباسپاسوز حاتشىسى كەرولاين لەۆيتت X-تە بۇل تۋرالى جازبا جاريالادى، ءبىراق تىكەلەي راستامادى. اقش مەملەكەتتىك دەپارتامەنتى دە ازىرگە ەگجەي-تەگجەيىن اشپايدى. سۇرانىسقا جاۋاپ رەتىندە ونىڭ وكىلى: «ماسەلە ءوتىنىش بەرۋشىلەردىڭ اقش زاڭناماسىنا سايكەس ۆيزا الۋ قۇقىعىن دالەلدەۋى جانە ەشكىمنىڭ امەريكا قۇراما شتاتتارىنىڭ قاۋىپسىزدىگىنە ءقاۋىپ توندىرمەۋىن قامتاماسىز ەتۋ تۋرالى بولىپ وتىر»، — دەدى.
ءقازىردىڭ وزىندە اقش ۆيزاسىنىڭ كەيبىر ساناتتارىنا، مىسالى، ستۋدەنتتىك ۆيزاعا ءوتىنىش بەرۋشىلەر وزدەرىنىڭ ونلاين-اككاۋنتتارىن اشۋى كەرەك. ەندى بۇل تاجىريبە باسقا ساناتتارعا دا تارالۋى مۇمكىن.
ايتا كەتەيىك، وتكەن ايدا ترامپ اكىمشىلىگى شەتەلدىك جۋرناليستەر مەن ستۋدەنتتەردىڭ ەلدە بولۋ مەرزىمىن شەكتەيتىنىن دە جاريالادى. ستۋدەنتتىك ۆيزالار ەڭ كوبى ءتورت جىلعا، ال شەتەلدىك جۋرناليستەرگە ارنالعان ۆيزالار ەڭ كوبى 240 كۇنگە (ۇزارتۋعا ءوتىنىش بەرۋ مۇمكىندىگىمەن) بەرىلەتىن بولادى. تۋريستەر ءۇشىن دە جاقىن ارادا قاتاڭ ەرەجەلەر ەنگىزىلۋى مۇمكىن. اقش ۇكىمەتىنىڭ بيىلعى جىلدىڭ باسىندا بەلگىلى بولعان جوسپارلارىنا سايكەس، ولار دا الەۋمەتتىك جەلىلەردى پايدالانۋى تۋرالى اقپاراتتى اشۋعا مىندەتتەلۋى ىقتيمال.