قازاقستانعا رەسەي فەدەراسياسىنان ءقاۋىپتى زيانكەستەرمەن زاقىمدالعان ورمان ونىمدەرىن اكەلۋ ارەكەتتەرىنىڭ جولى كەسىلدى. زاقىمدالعان اعاش ماتەريالدارىنىڭ جالپى كولەمى 125 تەكشە مەتردى قۇرادى، دەپ حابارلايدى infohub.kz سايتى.
رەسپۋبليكا اۋىل شارۋاشىلىعى مينيسترلىگىنىڭ مالىمەتىنشە، رەسەيدەن قاراعايدان جاسالعان قىلقان جاپىراقتى اعاش ماتەريالدارىنىڭ ءۇش پارتياسى كەلىپ تۇسكەن. ولاردا فيتوسانيتاريالىق باقىلاۋ قاراعايدىڭ قارا مۇرتتى قوڭىزى (Monochamus تۋىسى) — ءقاۋىپتى كارانتيندىك نىساننىڭ دەرناسىلدەرىن انىقتاعان.
اباي وبلىسىنىڭ سەمەي قالاسىندا ءارقايسىسى 40 تەكشە مەتردەن تۇراتىن پارتيالاردى قايتا تەكسەرۋ كەزىندە ەكى بۇزۋشىلىق تىركەلدى. تاعى ءبىر جاعداي استانادا انىقتالدى، وندا تەكسەرۋ 45 تەكشە مەتر كولەمىندەگى اعاش پارتياسىنىڭ زاقىمدالعانىن كورسەتتى.
بارلىق جاعداي بويىنشا زەرتحانالىق ساراپتاما جۇرگىزىلىپ، قاراعايدىڭ قارا مۇرتتى قوڭىزىنىڭ دەرناسىلدەرىنىڭ بار ەكەندىگى راستالدى. كارانتيندىك ءونىم يەلەرىنە قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 400-بابىنىڭ 2-بولىگىنە سايكەس اكىمشىلىك قۇقىق بۇزۋشىلىق تۋرالى حاتتامالار جاسالدى. ماتەريالدار مامانداندىرىلعان اكىمشىلىك سوتتارعا قاراۋعا جىبەرىلدى.
اۋىل شارۋاشىلىعى مينيسترلىگى سىرتقى ەكونوميكالىق قىزمەتكە قاتىسۋشىلاردى ەل اۋماعىنا كارانتيندىك ونىمدەردى اكەلۋ كەزىندە كارانتين زاڭناماسىن قاتاڭ ساقتاۋ قاجەتتىگىن ەسكەرتەدى.