ماسكەۋدىڭ «دينامو» كلۋبىنىڭ باس باپكەرى ساندرو شۆارس قازاقستاندىق جارتىلاي قورعاۋشى باقتيار زاينۋتدينوۆتىڭ دايىندىق دەڭگەيىنە قاتىستى پىكىر ءبىلدىردى، دەپ حابارلايدى infohub.kz كلۋبتىڭ رەسمي سايتىنا سىلتەمە جاساپ.
قازاقستان ۇلتتىق قۇراماسى تاريحىنداعى ۇزدىك مەرگەن وتكەن جازدا تۇركيالىق «بەشيكتاشتان» رەسەيلىك كلۋبقا اۋىسقان بولاتىن. سوڭعى ماچىن قازان ايىندا وتكىزىپ، ودان كەيىن جاراقاتىنان ساۋىعىپ جاتتى. وتكەن ماۋسىمنىڭ سوڭعى كەزدەسۋىندە مامىر ايىندا زاينۋتدينوۆ «دينامونىڭ» ءوتىنىم تىزىمىنە قايتا ەندى، ءبىراق الاڭعا شىقپادى.
«دايىندىقتىڭ باسىندا ول كوماندامەن جاتتىقتى، ءبىراق كەيىن ونىڭ بۇرىنعى دەنساۋلىق پروبلەمالارى قايتا پايدا بولدى. ءبىز ونىڭ بۇل قيىندىقتاردى جەڭىپ، الاڭعا قايتا ورالاتىنىنا سەنەمىز»، — دەدى شۆارس.
28 جاستاعى فۋتبولشىنىڭ جاي-كۇيى تۋرالى ەگجەي-تەگجەي اشىلمايدى. بۇعان دەيىن ونىڭ سىڭىرلەرى مەن بۇلشىق ەتتەرىنە قاتىستى پروبلەمالارى بولعان.
شۆارس بيىلعى جازدا «دينامونى» باسقارىپ، رەسەيلىك مامان رولان گۋسەۆتىڭ ورنىن الدى. نەمىس مامانىنىڭ باسشىلىعىمەن ماسكەۋلىك كلۋب العاشقى رەسمي ماچىن 25 شىلدەدە ءوز الاڭىندا — سامارانىڭ «كرىليا سوۆەتوۆ» كومانداسىنا قارسى وتكىزەدى.