شىعىس قازاقستان وبلىسىنداعى زايسان كولىندە ىزدەۋ-قۇتقارۋ جۇمىستارى اياقتالدى: قايىق اۋدارىلعاننان كەيىن سۋعا كەتكەن ەكى ەر ادامنىڭ دەنەسى سۋدان الىندى، دەپ حابارلايدى infohub.kz سايتى.
توتەنشە جاعدايلار مينيسترلىگىنىڭ رەسمي Telegram-ارناسىندا ءمالىم بولعانداي، ىزدەۋ جۇمىستارى تارباعاتاي اۋدانىنىڭ تۇعىل اۋىلدىق وكرۋگىندە جۇرگىزىلدى.
«15 قىركۇيەكتە ءۇش ەر ادام كولدە قايىقپەن بالىق اۋلاپ جۇرگەن. قاتتى جەلدىڭ سالدارىنان قايىق اۋدارىلىپ كەتتى. 1968 جىلى تۋعان بالىقشىلاردىڭ بىرەۋى سۋدان ءوز بەتىنشە شىعا الدى. ونى جەرگىلىكتى تۇرعىندار قۇتقارىپ الدى. 1968 جانە 1995 جىلى تۋعان ەكى ەر ادام سۋعا كەتتى. ولاردا قۇتقارۋ جيلەتتەرى بولماعان»، — دەپ اتاپ ءوتتى تجم.
ۆەدومستۆونىڭ دەرەگىنشە، اقپارات تۇسكەن ساتتەن باستاپ وقيعا ورنىندا تجم جەدەل شتابى ورنالاستىرىلدى. ىزدەۋ-قۇتقارۋ جۇمىستارىنا تجم بولىمشەلەرىنىڭ كۇشتەرى مەن قۇرالدارى تارتىلدى: سۇڭگۋىرلەر، قۇتقارۋ كاتەرلەرى، قايىقتار جانە باسقا دا ءجۇزۋ قۇرالدارى، ۇشقىشسىز ۇشۋ اپپاراتتارى، سۋاستى درونى، سونداي-اق جەرگىلىكتى تۇرعىندار.
بۇگىن ىزدەۋ جۇمىستارى بارىسىندا جەرگىلىكتى تۇرعىندار 1968 جىلى تۋعان ەر ادامنىڭ دەنەسىن تاپتى. ەكىنشى قازا تاپقان 1995 جىلى تۋعان ادامنىڭ دەنەسىن تجم سۇڭگۋىرلەرى جاعادان 8،9 كم قاشىقتىقتا تاپتى. ىزدەۋ جۇمىستارى تاۋلىك بويى جۇرگىزىلدى. قۇتقارۋشىلار كولدىڭ ايتارلىقتاي اكۆاتورياسىن، ونىڭ ىشىندە سۋاستى تەحنيكالىق قۇرالدارىن پايدالانىپ تەكسەردى. تجم سۇڭگۋىرلەرى 8 رەت سۇڭگۋ جاسادى.
قۇتقارۋ بولىمشەلەرىنىڭ جۇمىسىن كولدىڭ ايتارلىقتاي تەرەڭدىگى، ءتۇبىنىڭ كۇردەلى رەلەفى جانە سۋ استىنداعى شەكتەۋلى كورىنۋ قيىنداتتى.