شىعىس قازاقستان وبلىسىنداعى زايسان كولىنە بالىق اۋلاۋعا بارىپ، ۇيلەرىنە ورالماعان ەكى ەر ادام ءبىر اپتادان كەيىن قازا تاپقان كۇيدە تابىلدى. بۇل تۋرالى infohub.kz سايتى حابارلايدى.
قازاقستان رەسپۋبليكاسى توتەنشە جاعدايلار مينيسترلىگىنىڭ مالىمەتىنشە، 22 قىركۇيەكتە شىعىس قازاقستان وبلىسى كۇرشىم اۋدانى بالىقشى اۋىلدىق وكرۋگىندە 1979 جانە 2001 جىلى تۋعان ەكى ەر ادام زايسان كولىنە بالىق اۋلاۋعا بارىپ، قايتىپ ورالماعان.
تجم كۇشتەرى مەن قۇرالدارى ۇزدىكسىز ىزدەستىرۋ جۇمىستارىن ۇيىمداستىردى. ىزدەۋگە جەرگىلىكتى تۇرعىندار دا ءوز قايىقتارىمەن قاتىستى.
ىزدەستىرۋ جۇمىستارىنىڭ ءبىرىنشى كۇنى جاعالاۋدان 3–4 كم قاشىقتىقتا سۋعا باتقان قايىق تابىلدى.
29 قىركۇيەكتە جەرگىلىكتى تۇرعىندار 2001 جىلى تۋعان ەر ادامنىڭ دەنەسىن تاپتى. 30 قىركۇيەكتە قۇتقارۋشىلار سۋدان 1979 جىلى تۋعان ەر ادامنىڭ دەنەسىن الىپ شىقتى.
«ىزدەستىرۋ جۇمىستارى بارىسىندا تجم قۇتقارۋشىلارى 63 سۋاستى سۇڭگۋىن جاساپ، كولدىڭ جاعالاۋ سىزىعىن جانە سۋ ايدىنىن، ونىڭ ىشىندە ۇشقىشسىز ۇشۋ اپپاراتتارىن قولدانۋ ارقىلى تەكسەردى. ىزدەستىرۋ جۇمىستارىنا اۋا رايى جاعدايلارى، قاتتى جەل مەن سۋ ايدىنىنداعى تولقىن، سونداي-اق تەكسەرىلەتىن سۋ ايدىنىنىڭ اۋماعىنىڭ ۇلكەندىگى كەدەرگى كەلتىردى. بۇل سۇڭگۋىرلەردىڭ جۇمىسىن جانە سۋداعى ىزدەستىرۋ توپتارىنىڭ قوزعالىسىن ايتارلىقتاي قيىنداتتى»، — دەپ قوستى تجم.