ۋكراينا قارۋلى كۇشتەرىنىڭ بۇرىنعى باس قولباسشىسى، قازىرگى ۋاقىتتا ۇلىبريتانياداعى ەلشىسى ۆالەري زالۋجنىي ۋكراينانىڭ ناتو-عا ەشقاشان مۇشە بولمايتىنىن مالىمدەدى، دەپ حابارلايدى infohub.kz سايتى.
«ەۋروپالىق اقيقات» باسىلىمىنىڭ مالىمەتىنشە، زالۋجنىي ۋكراينا كونستيتۋسياسىندا بەكىتىلگەن اليانسقا كىرۋ باعىتىن پەرسپەكتيۆالى دەپ سانامايدى. «مەن ناتو-نى وتە جاقسى بىلەمىن. شامامەن 12 جىل بويى ناتو ستاندارتتارىن مەڭگەرۋگە جەكە ءوزىم اتسالىستىم جانە جىل سايىن ناتو-عا ەنە جازامىز دەگەن ەرتەگىلەردى تىڭدادىم. وكىنىشكە قاراي، ءبىز وعان ەشقاشان كىرمەيمىز!» — دەدى بۇرىنعى باس قولباسشى.
زالۋجنىي قارۋلى كۇشتەردىڭ قازىرگى دامۋ دەڭگەيىمەن اليانسقا قوسىلۋ مۇمكىن ەمەس دەپ سەنىمدى. سونداي-اق ول ناتو ەكىنشى دۇنيەجۇزىلىك سوعىس كەزىندەگى دوكترينالاردى باسشىلىققا الاتىنىن اتاپ ءوتىپ، ۇيىمنىڭ الەۋەتىنە وتە تەرىس باعا بەردى.
«ناتو، ەڭ الدىمەن، قازىرگى كۇيىندە قالادى، ال ۋكراينا رەسەي فەدەراسياسىنىڭ جارتى دەڭگەيىنە تەڭەسۋ ءۇشىن قاجەتتى ستاندارتتارعا كوشۋىنە 12 جىل كەتەدى»، — دەدى گەنەرال.
دەگەنمەن زالۋجنىي بۇگىندە ۋكرايناعا ناتو ەلدەرىندە بار تەحنولوگيالار قاجەت ەكەنىن مويىندادى.
بۇرىنعى باس قولباسشى سونداي-اق ۋكراينا ءۇشىن باسقا وداقتار تيىمدىرەك بولۋى مۇمكىن دەگەن پىكىر ءبىلدىردى. «ۋكراينا قۇرىلاتىن بلوكتار مەن وداقتارعا قوسىلادى. ءسىرا، ەۋروپالىق اسكەري قاۋىپسىزدىك بلوگى تۋرالى ءسوز بولادى»، — دەپ ەسەپتەيدى ول.