جاپونيادا بالا كۇتىمىنە بايلانىستى دەمالىسقا شىققان تۇڭعىش مەر سوكو كاۆاتا TIME جۋرنالىنىڭ ەڭ ىقپالدى 100 جاس جۇلدىزىنىڭ قاتارىنا ەندى. بۇل تۋرالى 36 جاستاعى ايەل 15 قىركۇيەكتە تۇڭعىش بالاسىن دۇنيەگە اكەلگەننەن كەيىن بىرنەشە اپتا وتكەن سوڭ ءمالىم بولدى، دەپ حابارلايدى infohub.kz سايتى.

كيوتو پرەفەكتۋراسىنداعى ياۆاتا قالاسىنىڭ مەرى كاۆاتا بيىل سايلانبالى لاۋازىم يەلەرى بالا تۋۋعا بايلانىستى دەمالىس الۋى كەرەك پە دەگەن ۇلتتىق پىكىرتالاستىڭ ورتاسىندا قالعان ەدى. ونىڭ دەكرەتكە شىعۋ شەشىمى جاپونيادا قولداۋ مەن سىندى قاتار تۋدىردى. تۋۋ دەڭگەيىن كوتەرۋگە تىرىسىپ جاتقان ەل ءۇشىن بۇل ماسەلە ەرەكشە وزەكتى بولدى.

الەۋمەتتىك جەلىلەردەگى كەيبىر پىكىرلەر بالا تاربيەلەۋدىڭ وڭاي ەمەس ەكەنىن، كاۆاتانىڭ قولىنان كەلگەنىنشە ارەكەت ەتىپ جاتقانىن اتاپ ءوتتى. جاپون قوعامى جۇكتىلىكتى ەسكەرەتىن جۇيەلەردى ازىرلەي الماعانىن ءبىر پايدالانۋشى جازسا، تاعى بىرەۋى كاۆاتا وتباسىن ءبىرىنشى ورىنعا قويۋ ارقىلى وزگە ايەلدەردىڭ ساياساتقا كەلۋىن جەڭىلدەتەتىن تاماشا ۇلگى كورسەتىپ جاتقانىن ايتتى.

الايدا سىنشىلار قوعامدىق مىندەتتەردەن قول ءۇزۋ «جاۋاپسىزدىق» دەپ سانادى. ەگەر كاۆاتا جۇكتى بولعىسى كەلسە، «لاۋازىمعا كىرىسپەس بۇرىن سولاي ىستەۋى كەرەك ەدى» دەگەن پىكىرلەر دە ايتىلدى. بىرەۋى ۇزاق مەرزىمدى دەمالىسقا شىققىسى كەلگەن جوعارى لاۋازىمدى تۇلعالار «قىزمەتتەن كەتۋى كەرەك» دەسە، تاعى بىرەۋلەرى دەكرەت دەمالىسى كەزىندە جالاقىنى قىسقارتۋ قاجەت دەپ تالاپ ەتتى.

بالاسىن دۇنيەگە اكەلەر الدىندا بي-بي-سيگە بەرگەن سۇحباتىندا كاۆاتا سىنداردى ەلەمەي، ءوز جۇمىسىنان ءلاززات الاتىنىن ماقتانىشپەن مالىمدەپ، ءقازىر بالالى بولىپ، وتباسىن قۇرۋعا ءدال ۋاقىت كەلگەنىنە سەنەتىنىن جەتكىزدى.

«ەگەر دەكرەتكە شىققان ساياساتكەرلەردى سىنايتىن بولساق، بۇل 20 مەن 40 جاس ارالىعىنداعى — جۇكتى بولا الاتىن بارلىق ايەلدى مەملەكەتتىك قىزمەتتەن شەتتەتىپ جاتقانىمىز»، — دەدى ول.

جاپونيا قالالىق قىزمەتكەرلەرگە دەكرەت دەمالىسىن بەرگەنىمەن، جەرگىلىكتى سايلانبالى لاۋازىم يەلەرى ءۇشىن ءقازىر زاڭنامالىق نەگىز جوق. سوندىقتان كاۆاتا ءوز كەڭسەسىمەن بىرلەسىپ جوسپار جاسادى. ول 16 اپتا بويى وكىلەتتىگىن ورىنباسارى سيگەتو نوسەگە بەرىپ، مۇمكىندىگىنشە قاشىقتان جۇمىس ىستەدى.

15 قىركۇيەكتە مەر كاۆاتا قىز بالانى دۇنيەگە اكەلگەنىن جاريالادى. ول X الەۋمەتتىك جەلىسىندە فوتوسۋرەت جاريالاپ، قولداۋ كورسەتكەندەرگە العىس ايتتى جانە الەۋمەتتىك ماسەلەلەردى بۇكىل ەل كولەمىندە ناسيحاتتاۋ ماقساتىنان تايىنبايتىنىن تاعى دا راستادى.

«الداعى سانسىز قيىندىققا بەتپە-بەت كەلىپ، اتا-انا بولۋدىڭ شىنايى ءمانىن تۇسىنە وتىرىپ، سول تاجىريبەنى جۇرگىزىپ جاتقان ساياساتىما ناقتى ۋاقىتتا بەينەلەگىم كەلەدى»، — دەپ جازدى ول.

«بۇگىندە اتا-انالار مەن بالالار الدىندا تۇرعان كوپتەگەن سىن-قاتەرگە سول ءومىردى ءوزىم باستان كەشىرىپ جاتقان ادام رەتىندە ءدال سول كوزقاراسپەن قاراپ، بىرگە قالاي جول تابا الاتىنىمىزدى ويلاعىم كەلەدى».