قىتايدىڭ ORG Technology Co Ltd كومپانياسى — قىتايداعى اليۋميني بانكىلەرىنىڭ ءىرى ءوندىرۋشىسى جانە الەمدەگى ەڭ ءىرى بەس كومپانيانىڭ ءبىرى — الماتىدا زاۋىت سالۋ جوباسى ءۇشىن جەرگىلىكتى سەرىكتەستەرمەن كەلىسىمگە كەلگەن سياقتى. بۇعان ەكونوميست، قارجى كەڭەسشىسى جانە Finmentor.kz نەگىزىن قالاۋشى ارمان باتايەۆ نازار اۋداردى، دەپ حابارلايدى infohub.kz.
«استانا» حالىقارالىق قارجى ورتالىعىندا (احقو) جاڭا حولدينگتىك كومپانيا — ORG OREA Industries Holding Ltd. تىركەلدى. ونىڭ جارعىلىق كاپيتالى $47،4 ملن قۇرايدى. كومپانيانىڭ قۇرىلتايشىلارى ORG Kazakhstan Packaging Ltd. جانە Oasis Partners Holding SPC Ltd. بولدى. كەيىن سوڭعىسى اتاۋىن OREA Industries Holding SPC Ltd. دەپ وزگەرتتى.
جاڭا حولدينگ الماتىداعى ەنشىلەس كومپانيانى باسقارۋ ءۇشىن قۇرىلعان. بۇل كومپانيا ەكى كومپونەنتتى مەتالل بانكىلەر شىعاراتىن كاسىپورىندى سالۋعا، يەلەنۋگە، پايدالانۋعا جانە قىزمەت كورسەتۋگە ءتيىس. زاۋىتتىڭ جوسپارلانعان قۋاتى — جىلىنا 1 ملرد بانكى.
ORG Technology كومپانياسىنىڭ قازاقستان نارىعىنا شىعۋ جوسپارى بۇعان دەيىن بەلگىلى بولعان ەدى. 2025 جىلدىڭ ماۋسىمىندا قىتايلىق كومپانيانىڭ ديرەكتورلار كەڭەسى قازاقستاندا جوبالىق كومپانيا قۇرىپ، الماتىدا ەكى كومپونەنتتى اليۋميني بانكىلەرى زاۋىتىن سالۋ تۋرالى شەشىم قابىلدادى.
جوباعا سالىناتىن جالپى ينۆەستيسيا شامامەن 646،52 ملن يۋان نەمەسە $90-95 ملن دەپ باعالانعان. كەيىن «استانا» حالىقارالىق قارجى ورتالىعىندا جارعىلىق كاپيتالى $50 ملن بولاتىن ORG Kazakhstan Packaging Ltd. تىركەلدى.
ەندى ORG OREA Industries Holding Ltd. پايدا بولۋى جوباعا قازاقستاندىق سەرىكتەستەردىڭ تارتىلۋى مۇمكىن ەكەنىن كورسەتەدى. جاڭا حولدينگتىڭ قۇرىلتايشىلارىنىڭ ءبىرى بولعان Oasis Partners Holding SPC Ltd. 2025 جىلدىڭ 11 جەلتوقسانىندا تىركەلگەن. 2026 جىلدىڭ 25 مامىرىندا كومپانيا اتاۋىن OREA Industries Holding SPC Ltd. دەپ وزگەرتتى.
OREA Industries Holding SPC Ltd. اكسيونەرى — ALGAZY Holding Limited. بۇل كومپانيا 2025 جىلدىڭ 27 اقپانىندا $10،2 ملن جارعىلىق كاپيتالمەن تىركەلگەن. ونىڭ قۇرىلتايشىلارى — ساۋلە العازيەۆا جانە زاۋرە العازيەۆا. العازيەۆتەر وتباسى قازاقستانداعى ەڭ كونە كاسىپورىنداردىڭ ءبىرى — «پەرۆىي پيۆزاۆود» ءجشس-نىڭ ەداۋىر ۇلەسىنە يە. سونىمەن قاتار، وتباسى مال شارۋاشىلىعى جانە الكوگولدىك سۋسىندار ءوندىرىسى سالاسىنداعى باسقا دا جوبالاردى دامىتۋدا.
بۇل قازاقستاندا باستالۋى مۇمكىن ءاليۋمينيدى قايتا وڭدەۋدەگى العاشقى جوبا ەمەس. الەمدەگى ەڭ ءىرى اليۋميني وندىرۋشىلەردىڭ ءبىرى — قىتايلىق Xinfa Group — پاۆلودار وبلىسىنداعى زاۋىتقا $15 ملرد ينۆەستيسيا سالادى. زاۋىتتا شيكىزاتتان بولەك، دايىن ونىمدەر، ونىڭ ىشىندە سىمدار مەن سمارتفون كورپۋستارى شىعارىلادى.
الەمدەگى ءاليۋمينيدى قايتا وڭدەۋشىلەردىڭ العاشقى وندىعىنا كىرەتىن Xinfa Group $15 ملرد-تى ءۇش كەزەڭدە ينۆەستيسيالاۋى ءتيىس: ءبىرىنشى كەزەڭ — 2026-2027 جىلدارى $5،5 ملرد، ەكىنشى كەزەڭ — 2028 جىلى $4 ملرد، ءۇشىنشى كەزەڭ — قالعان $5،5 ملرد.