قىتايلىق اۆتوموبيلدەر قاشىقتان باسقارۋ فۋنكسيالارىمەن ءجيى جابدىقتالۋدا، الايدا مۇنداي تەحنولوگيالار يەسىنە قارسى قولدانىلۋى مۇمكىن. قازاقستانعا كىرگەننەن كەيىن Zeekr 9X پرەميۋم كروسسوۆەرىنىڭ ەلەكترونيكاسى ءبىرقاتار جۇيەلەردىڭ جۇمىسىن اۆتوماتتى تۇردە شەكتەدى، دەپ حابارلايدى infohub.kz سايتى.
ليۋ ەسىمدى جۇڭگو ازاماتى شامامەن جارتى جىل بۇرىن Zeekr 9X ساتىپ الىپ، ونىمەن جۇڭگو – قازاقستان – ەۋروپا باعىتى بويىنشا ساپارعا شىققان. قازاقستان شەكاراسىنان وتكەننەن كەيىن كولىك كەنەتتەن ءبىرقاتار ەلەكتروندى جۇيەنىڭ جۇمىسىن شەكتەگەن.
كروسسوۆەردىڭ ناۆيگاسياسى، كەيبىر ەلەكتر جەتەكتەرى جانە بەنزين باگىنىڭ ەلەكتروندى قۇلپى ىستەن شىققان. ال رۋل باسقارۋى، تەجەگىش جانە باسقا دا ماڭىزدى جۇيەلەر ادەتتەگىدەي جۇمىس ىستەگەن.
Zeekr كومپانياسى بۇعان مەملەكەتتىك شەكارادان وتكەندە اۆتوماتتى تۇردە ىسكە قوسىلاتىن قورعانىس مەحانيزمى سەبەپ بولعانىن ءتۇسىندىردى. بۇل مەحانيزم ۇرلىققا، كونترابانداعا جانە كولىكتەردى حالىقارالىق ەكسپورتتاۋ ەرەجەلەرىن بۇزۋعا قارسى قولدانىلادى.
كومپانيا ماماندارى تەكسەرۋدەن كەيىن كولىكتىڭ تولىق فۋنكسيونالىن قاشىقتان قالپىنا كەلتىردى. ساپار ءبىر تاۋلىكتەن استام ۋاقىتقا كەشىكتى. ءليۋدىڭ ايتۋىنشا، ول ساپار الدىندا رەسمي ديلەردە جوسپارلى تەحنيكالىق قىزمەت كورسەتۋدەن ءوتىپ، قازاقستان ارقىلى ەۋروپاعا بارۋ نيەتى تۋرالى حابارلاعان، ءبىراق وعان بلوكتالۋ مۇمكىندىگى تۋرالى ەسكەرتپەگەن.
Zeekr كومپانياسى كەلەسى مەملەكەتتىك شەكارالاردى كەسىپ وتكەندە، قورعانىس الگوريتمدەرى قايتا ىسكە قوسىلسا، جاعداي قايتالانۋى مۇمكىن ەكەنىن اتاپ ءوتتى. بۇل قازاقستانعا كىرگەننەن كەيىن كولىك فۋنكسيالارىنىڭ ءىشىنارا شەكتەلۋىنىڭ العاشقى جۇرتشىلىققا بەلگىلى جاعدايلارىنىڭ ءبىرى. قىتايدىڭ زاماناۋي كولىكتەرىنىڭ يەلەرى حالىقارالىق ساپارلار كەزىندە ەلەكتروندىق جۇيەلەردىڭ جۇمىس ەرەكشەلىكتەرىن وندىرۋشىدەن الدىن الا سۇراپ الۋى كەرەك.