2026 جىلعى 1 تامىزداعى جاعداي بويىنشا قازاقستاندىقتار ءبىرىڭعاي جيناقتاۋشى زەينەتاقى قورىندا (بجزق) ينۆەستيسيالىق كىرىستى قوسقاندا 28 تريلليون تەڭگەدەن استام قاراجات جيناقتاعان. سوڭعى ءبىر جىلدا جيناق كولەمى 14،1%-عا ءوسىپ، اشىلعان شوتتار سانى 18،89 ميلليونعا جەتىپ، 12 ايدا 6،3%-عا ارتقان، دەپ حابارلايدى infohub.kz.
زەينەتاقى جيناقتارىنىڭ نەگىزگى بولىگىن مىندەتتى زەينەتاقى جارنالارى (مزج) قۇرايدى — 26،31 تريلليون تەڭگە، بۇل بىلتىرعىدان 11،4%-عا كوپ. بۇل قاراجات 11،39 ميلليون شوتقا بولىنگەن، ورتاشا ەسەپپەن ءار سالىمشىعا 2،3 ميلليون تەڭگەدەن كەلەدى.
زياندى وندىرىستەردەگى جۇمىسشىلار ءۇشىن تولەنەتىن مىندەتتى كاسىپتىك زەينەتاقى جارنالارىنىڭ (مكزج) كولەمى 751،56 ميلليارد تەڭگەدەن استى (ءوسىم 6،6%). ولار 789،48 مىڭ شوتتا ساقتالادى، ورتاشا جيناق مولشەرى — 952 مىڭ تەڭگە.
ەرىكتى زەينەتاقى جارنالارى (ەزج) ەسەبىنەن جيناقتاردىڭ ءوسۋى جالعاسۋدا: ولاردىڭ كولەمى 10،41 ميلليارد تەڭگەنى قۇراپ، ءبىر جىلدا 14،9%-عا ءوستى. ەزج ءۇشىن 463،69 مىڭ شوت اشىلعان، ورتاشا مولشەرى — 22،5 مىڭ تەڭگە.
جۇمىس بەرۋشىنىڭ جاڭا مىندەتتى زەينەتاقى جارناسىنان (جمزج) قالىپتاساتىن جيناقتاردىڭ ايتارلىقتاي ءوسۋى ەرەكشە اتاپ ءوتىلدى — ولار 2،5 ەسەگە ءوسىپ، 1،27 تريلليون تەڭگەگە جەتتى. بۇل قاراجات 6،06 ميلليون شارتتى زەينەتاقى شوتىندا ەسەپتەلەدى، ورتاشا ەسەپپەن ءار سالىمشىعا 210،2 مىڭ تەڭگەدەن كەلەدى.
2026 جىلدىڭ قاڭتار-شىلدە ايلارىندا بجزق-دان بارلىق جارنا تۇرلەرى بويىنشا تولەمدەر مەن ساقتاندىرۋ ۇيىمدارىنا اۋدارىمدار 1،08 تريلليون تەڭگەنى قۇرادى. زەينەتكەرلەرگە 170،95 ميلليارد تەڭگە تولەندى، ال زەينەت جاسىنا جەتۋگە بايلانىستى كەستە بويىنشا ورتاشا ايلىق تولەم 38 993 تەڭگەنى قۇرادى.
جىل باسىنان بەرى تۇرعىن ءۇي جاعدايىن جاقسارتۋعا جانە ەمدەلۋگە ءبىرجولعى تولەمدەر 435،20 ميلليارد تەڭگەنى، مۇراگەرلىك بويىنشا — 63،06 ميللياردتى، قازاقستاننان تىس جەرگە تۇراقتى تۇرۋعا كوشكەندە — 28،13 ميللياردتى، مۇگەدەكتىگى بار ادامدارعا — 2،05 ميللياردتى، جەرلەۋگە — 5،56 ميلليارد تەڭگەنى قۇرادى. ساقتاندىرۋ ۇيىمدارىنا زەينەتاقى اننۋيتەتىن راسىمدەۋ ءۇشىن 378،56 ميلليارد تەڭگە اۋدارىلدى.
ەسكە سالايىق، جاڭا زەينەتاقى جارناسىنىڭ كىرىستىلىگى قازاقستانداعى باعا وسىمىنەن ەكى ەسە اسىپ ءتۇستى. بۇعان دەيىن بجزق قازاقستاندىقتارعا زەينەتاقىعا وزدىگىنەن جيناقتاۋ نەلىكتەن قاجەت ەكەنىن تۇسىندىرگەن بولاتىن.