حالىقارالىق قارتتار كۇنىنە وراي قازاقستانداعى 274،2 مىڭ زەينەتكەرگە جالپى سوماسى 3،8 ملرد تەڭگە بولاتىن ءبىرجولعى تولەم بەرىلەدى. قارجىلاي كومەك كىمدەرگە تيەسىلى ەكەنىن قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى حابارلادى، دەپ جازادى infohub.kz سايتى.
تولەم ەڭ تومەنگى جانە ودان تومەن مولشەردە زەينەتاقى الاتىندارعا — استانادا، ۇلىتاۋ وبلىسىندا، پاۆلودار جانە اقمولا وبلىستارىندا بەرىلەدى. سونداي-اق كومەك ماڭعىستاۋ وبلىسى مەن شىمكەنتتەگى 70 جاستان اسقان قازاقستاندىقتارعا، قاراعاندى وبلىسىنداعى 75 جاستان اسقان ازاماتتارعا، سونداي-اق تۇركىستان وبلىسىندا ۇيدە ارناۋلى الەۋمەتتىك قىزمەت الاتىن جالعىزباستى قارتتارعا قاراستىرىلعان.
ەڭبەك مينيسترلىگىنىڭ مالىمەتىنشە، جالپى 2026 جىلى 120 مىڭعا جۋىق قارت قازاقستاندىقتى الەۋمەتتىك قولداۋعا 6،6 ملرد تەڭگەدەن استام قاراجات باعىتتالعان. بۇل قاراجات وتىن، كومىر، دارى-دارمەك ساتىپ الۋعا، تۇرمىستىق جانە كوممۋنالدىق شىعىنداردى وتەۋگە، ەمدەلۋگە، ساۋىقتىرۋعا جانە ساناتوري-كۋرورتتىق ەمدەلۋگە جۇمسالادى.
ەسكە سالايىق، بۇگىندە قازاقستاندا 2،6 ملن-عا جۋىق ازامات جاسىنا بايلانىستى زەينەتاقى تولەمىن الىپ وتىر.
2026 جىلعى 1 قاڭتاردان باستاپ ىنتىماقتاستىق زەينەتاقىنىڭ مولشەرى 10%-عا ارتتى. سونىمەن قاتار ءومىر ءسۇرۋ دەڭگەيىنىڭ ەڭ تومەنگى مولشەرى وزگەرۋىنە بايلانىستى بازالىق زەينەتاقى تولەمىنىڭ مولشەرى كوتەرىلدى. بيىل بازالىق زەينەتاقىنىڭ ەڭ تومەنگى مولشەرى ءومىر ءسۇرۋ دەڭگەيىنىڭ ەڭ تومەنگى مولشەرىنىڭ 70%-ىنا جەتكىزىلدى، ال ەڭ جوعارعىسى 110%-دان 118%-عا دەيىن ءوستى.
بۇعان دەيىن «كۋرسيۆ» استاناداعى زەينەتكەرلەر قارتتار كۇنىنە شامامەن 11 مىڭ تەڭگەدەن الاتىنىن جازعان. كومەك استانادا تىركەلگەن جاسىنا بايلانىستى زەينەتكەرلەر مەن ەڭ تومەنگى زەينەتاقى الۋشىلارعا تاعايىندالادى. «ازاماتتارعا ارنالعان ۇكىمەت» تىزىمدەرىنە سايكەس، تولەمدەر 110 مىڭنان استام ادامدى قامتيدى.