Балалар шығармашылық жағынан ересектерден асып түседі деген кең тараған пікір жаңа зерттеу барысында расталмады: ересек қатысушылар неғұрлым тың және сәтті идеялар ұсынғанымен, өзіне сенімділікте мектепке дейінгі балалардан айтарлықтай қалыс қалды, деп хабарлайды infohub.kz сайты.
Австриядағы Грац университетінің психологтары эксперимент өткізді, оған бес-алты жастағы 92 бала мен шамамен жиырма жастағы 70 ересек адам қатысты. Қатысушыларға үш тапсырма берілді: үш минут ішінде қаңылтыр банкінің қолданылуының ерекше тәсілдерін ойлап табу, уақыт шектеусіз еркін сурет салу және сегіз минут ішінде жоқ фантастикалық жануарды бейнелеу. Бес тәуелсіз сарапшы авторлардың жасын білмей, 670 идея мен 324 суретті бағалады.
Барлық тестте ересектердің жұмыстары жаңалығы, тиімділігі және жалпы креативтілігі бойынша жоғары балл жинады. Олардың басымдығы түбегейлі жаңа нәрсе ойлап табуды талап ететін ойдан шығарылған тіршілік иесін жасау кезінде ерекше байқалды. Балалар тапсырмаларға азырақ уақыт жұмсағанымен, өз нәтижелерін әлдеқайда жоғары бағалап, қателесуден онша қорықпай, процестен көбірек ләззат алды.
Дегенмен сауалнамаға қатысқан ересектердің 79%-ға жуығы балаларды бәрібір шығармашылығы мол деп атады. Зерттеу авторларының бірі Матиас Бенедектің пікірінше, адамдар балалардың көзге түсетін ынтасы мен рөлдік ойындарға құмарлығын нақты қабілеттерімен жиі шатастырады. Ғалым ересектерге мектепке дейінгі балалардың ойынға негізделген көзқарасын және бөтеннің бағасынан қорықпай идея ойлап табу шеберлігін үйренуге кеңес берді.